جب لي عليهن زود كان انت توحي ... وخذ من يبيحك بالرضا والسهال
صوتِّ لعيالي وقلت: جيبوا رباط ... اربطوا حلال السحت خلوه يناط
والصبح والمغرب على خمسة اصواط ... خلوه يشوف الهول هو والنكال
قال انت حساد ولابك مروه ... اشكي عليك الحال وتقول: وُوِّه
هو الحكم بيدك تحبسن بقوَّه ... تبي تهينن لين تفرق عيالي
وحنا جلسنا عند حدا المشايخ ... يوم أني جيت الشيخ ولاي دايخ
جلس على الكرسي ودلسي يذايخ ... وخربط خرابيط بلايا مجال
قال: انتبه يا شيخ هذا عنيد ... اشكي عليه الحال وفرَّط من يدي
كل ما قلت انه زان دلى يزيد ... نكد عليَّ وغربلن وانتحى لي
والمشكله طاريه يجذب حريمي ... مرده علي يقول انك لئيم
يبي يخليني لحالي يتيم ... كله حَسَدْ يا شيخ ماهو عدال
التفت على الشيخ يقول: يا فلان وراك على الريِّسِّ توريه حقران
تأخذ حريمه منه وتخليه وحدان ... يقعد عَزَبْ ترى هذا الخمالِ
قلت:
أخذ منهن خمس وابقي وحيده ... كل أكثر المخلوق يقني فريده
وش حيث الديك يعطي بديده ... وش نفلته من بد كل الحلال
الشيخ نزرني قال: أثرك عنيد ... احسبك ذهين ولك راي سديد
وأثرك على ما يقال دايم عنيد ... نشوف طريقه لين تمشي عدال
زهم على الشرطة هاتوا جنود ... روحوا بها المسكين للحبس مشدود
خونوا عليه انه على الديك ما يعود ... خلوه بالخفر يشوف النكال
رجعت لم الديك حبيت راسه ... وجيته بالمعروف يا أبا الفراسه
إدمح لي هالمره وأعطيك الرياسه ... وانا تراي اخطيت مالي مجال
صلاة ربي عد ما كاين كان ... على محمد صاحب الخير والشان
وآله وصحبه ما تحرك وما بان ... هذا اللي انا حصلت وهذا التوالي
стр. 1227
وقال الجديعي أيضًا في القويعة:
القويعه صبت صويت مسيان ... تقول زاد الهم والليل جاني
من جيت لمه صك بابه وخلان ... واهل الفلايح بطَّلوا السواني
وان رحت للبر جاني الجرّ شقران (١) ... ضاقت عليَّ الواسعة والمباني
مرت علي تقول: تكفى يا أبو فلان ... شف لي طريقه كان تبغى الحساني
حط لي زريع يجلي الهم وأحزان ... نسوي بنا معروف والوقت فاني
قلت: اعقبي يا الماكره ما بك حْسان ... ما عندك الفلاح غير الهوان
إلى نزلتي بأرض تصير قيعان ... انت خراب العيش باول زمان
هذاك تقومين السحر وقت الأدَّان ... قبل يبين الصبح وانت طيران
حرثت المزرع وهو ما بعد بان ... تدورين الحب بأخفى مكان
قالت:
من ردي حظي يا جماعه ونقصان ... أشكي عليه الحال وهو يعصاني
أنا فقيره لاتردن لحقران ... شف لي طريقه يا السنافي تراني
ما جيت لمك غير حادْن زوْيَّان ... تراكم عليَّ البين همّ طواني
انا مسيكينة ولا صار لي أعوان ... الدمع من عيني على الخد بان
داري شجيره وانت نازلٍ نصيوان ... عندك بيوت عاليات المباني
خف بي من الله وابذر الزرع عجلان ... لا تصير حسَّاد بليا حساني
وأنا تراي أرصد الزرع من شان ... انظر عن البعيد وانتم إلا داني
ودي أقاصركم على خير وحسان ... حتى تشوفون الطرب والليان
قلت:
انا قبل خايف منك زملان ... واليوم تقل عندك من القول ثاني
قالت:
أنا واياك نصير جيران ... نبي نترافق لين تالي الزمان
стр. 1228
قلت: أبشري بالرزق والخير طوفان ... نبي نحط زروع ما لهن أداني
إلى خبرتك ما تجينه إلى بان ... نبذر رفاع الأرض هي والطَّمان
هاتوا البذر من دون كيل وميزان ... وخلوا المكاين يزعجن السواني
بذرنا لنا زرع وللزرع مديان ... وحطينا حياض واسعاتٍ حسان
طلع على المطلوب ما فيه نقصان ... ما ناقصه حاجه يبي شي ثاني
يوم اني دريت مرة جان من جان ... قال: انتبه تراك ضايع المعاني
ساعة ما شفت الزرع وانا اطيح ندمان ... لعبت علي القويعه بسْهَلان
رحت وشكيت وجيتّ له جنود شجعان ... لقيتها ترعى بكل التهاني
رحنا بها للمحكمة كره واحزان ... جلسنا عند الشيخ نبغي المعاني
هي ما تمزمز ولا انا صرت مشتان ... كيف القوبعه تصير اقوى جنان
قلت استمع يا شيخ انا جيت من شا ... نها القوبعة سوَّتْ علينا روْجان
انا بذرت زريع والزرع له شان ... خسارته ما تنحكي باللسان
بوم أني جيت الزرع والى الزرع عدمان ... وألى هذي ام عريف ترعى وزاني
قلت:
من اللي اكل زرعي وخلاه قيعان ... وانت تقولين: ارصده لا يهان
قالت: ما أناب اصغر عيالك علشان ... تبيني انطر الطير لي جاه عاني
اللي اكل زرعك عصافير قطعان ... الفرق إلى اقبل يروج روجان
واليوم انا يا شيخ تراي خسران ... لعبت على القويعه بدوران
قال:
وراك يا أم عريف توذين الاخوان ... قعدت على زرعه بليا معاني
قالت:
يا شيخ ما جيته على غير برهان ... ولا عمر فلاح من قبله شكاني
عندي عليه شهود يا شيخ وبرهان ... انه مواجرني على علم ثاني
стр. 1229
والقنبزه يا شيخ ما تنفع انسان ... كأن هو ذهين فيطلعون الذهان
عندي عليه صكوك والزرع ما بان ... انه مواجرني عليه بنطران
التفت على الشيخ يقول: يا فلان ... وش لون علمك صايرْ قِلَّباني
وش لون تواجر القوبعه وقت الأزمان ... واليوم تقول: شغل القوبعه ما هجاني
قلت: أنتبه يا شيخ لا تصير غضبان ... لا تصدق القويعه بكل المعاني
شف (النقابي) بفعلها صار منهان ... كلت زريعه لين اصبح مداني (١)
وش لون يروح الزرع واصير خَوَّان ... والقوبعة تلعب علي في مكاني؟
فكن منه لو الله اجيب سيلان ... شوزن إلى ثارت تروغ روغان (٢)
واقلع مداها عن محلي بودران ... ماله معي شركه بزرعي تراني
قالت:
المشكلة يا شيخ طحنا بْوَرطان ... قام يتهدد بالخطر والعفان
كأنه يريد الحرب يا شيخ واحزان ... خله يتبين عن حدود المباني
حتى يشوف الحرب لي جوه شجعان ... نريه ضرب مصقلات اليماني
التفت على الشيخ قال: انت غلطان ... القوبعة هذي لها الحق بان
اصلك ردي فكر ولا عندك خسان ... اذلف وخل القوبعه بالتهاني
تصدر عليك الصك وتشوف حقران ... والقوبعه ترعي بقاصي وداني
وقال عبد الله بن علي الجديعي أيضًا في العصفور والجرذي:
زرعي تخاشر به من الجند عدوان ... مختلفة من بين جرذي وفاره
نطحني الجرذي والي تقل مشتان ... قلت: وش بلاكم؟ قال: بصدري حراره
قلت: الخبر؟ قال: الخبر شين يا فلان ... الزرع لا تسقيه يقلب خضاره
لي طال ما يصلح غدا تقل عودان ... يبلشنا بشيله ويعترض بالجحاره
قلت: انت الحرامي واقفٍ تقل ديَّان ... تبي تحصد الزرع قبل غماره
والعلم الا قشر جاني الطير فزعان ... يقول ترى الجوذي يغبَّي بْداره
قلت:
стр. 1230
هو لك معي شرك تشكي علشان ... نشوف مشكلنا او تجيبه شطاره؟
قال: أيه ما تشوفن اركض وتعبان ... من يوم تحط الزرع أصلَّح عماره
يوم اني جبت الزرع والى الزرع مليان ... هالنملة التي غطته في سماره
قلت: أصبرن هو زرعنا صار ميدان ... من ضاق صدره جا يقدِّم بثاره
قالت: تحسين مثل من نام كسلان ... اللى يتكاسل ما يجمِّع ثجاره
قلت أصبري ما أنيب صابر لما جان ... ومدتي راحت وانا في خساره
صوت لي الجرذي يقول: أنت غلطان ... ني ناخذ الصافي ونبقى الخشاره
صابك حرور يوم شفت السّبل زان ... تبي تهاوشنا تجيبه شطاره
قلت:
من بدهم انت يا الحرامي تَبلَّانْ ... حيث ان زرعي صايرٍ لك خَباره
قال: انت ما تَمَيِّز ولا فيك فرقان ... ولا تعطي الجيران غاية وقاره
مير انقلع لا تصير بالخلق قرَّان ... يوم شفتنا نشبع يصيبك حراره
قلت: انت يالعصفور وش فيك زعلان ... قرِّب تكلم كان عندك نعاره
قال: انت ملقوفٍ ولا تحسن الشان ... فحج على زرعك وجوِّد صراره
الرزق عند اللي على الخلق منان ... هو اللي يرزقنا بليا كداره
قلت:
عطني يمين الشرع ما تجيه لي بان ... انتم خراب العيش انتم دماره
أخاف تبعدني وبعدين خوَّان ... وتصير من بعد الصداقة مراره
قال:
والله يمين القطع ما أجيه، وان كان ... تبي كفيل يكفلن بالخساره
حطيت كفيل يكفل النقص وارهان ... ولا تدور اللجات هي والقشاره
انكس لبيتك لا تجي وانت شفقان .. وأبا ارصده وان كان تدفع أجاره.
قلت:
أنت والجرذي متى صرتوا إخوان؟ ... الكل منكم ما يَعَرفْ الطهاره
الجرذي خبيث ما يوافق وحيوان ... ما يومن بالمكر راعي حباره
стр. 1231
اخاف توهِّقْني وبعدين تنسان ... يروح زرعي بين جرذي وفاره.
مع اليمامة، وهي نوع من الحمام البري:
يمامة تنعي بعرض الدريشه ... تجر صوت يفجع اللي حزين
ومن العنا قامت تمزر بريشه ... والبحله اللي ما يعرف الرطين
لي جيت اباسئلها والي مستهيشه ... عجزت اميز قولها والحنين
قلت: اصبري يا ام العيون الرميشه ... كثر البكا ما يذري وش تبين
قالت ثكيلي وابصلح عشيشه ... ولا أدري يا المحبوب وش يعتريني (١)
عيالي صغار لا فزتهم بهيشه ... واخاف صدفات الليالي تجيني
هاللي تشوف الحال كني وليشه ... لما تروح أيام همن تبين
عيالي يتامى والليالي وحيشه ... علي وليف راح ذا له سنين
قلت:
النوح هذا يزودك بالربيشه ... والصبر يالقرمه هو اللي يعين
قبلك انا قلبي غدا كالجريشه ... متكسر من فقد مضنون عيني
الموت فجعني يوم جان بجيشه ... وشال الحبيبه وصرت عقبَهْ حزين
لكن اصبري يم العيون الدهيشه ... والله هو اللي يرحم المذنبين
زوجك مسافر يم فيفا وبيشه ... يمكن يجي يا قدوة الغانمين
رايح يدور لك زيادة معيشه ... وان مات تلقين العوض له قمين
قالت:
الحب ما خالط قليبك نشيشه ... خلن انوح وتزعج الدمع عيني
قال عبد الله بن علي الجديعي:
هذه أبيات لها قصة كان عندنا جمل وضاع في البر ورحت لعلي أجده،
стр. 1232
ومريت على أهل بيت شعر بدو ووجدت مجمع حريم كثيرات قلت يا بنات ما شفتن لي جمل؟ قالن: ما شفناه، وإذا كلب ينطلق علي، قالت إحداهن: الكلب لا يأكلك، وكنت لابس كنادر من نوع البوت، ولما وصل إليَّ لكمته مع الحنك، وغدا الدم يسيل على الأرض فهرب وصحن جميع: عورت كلبنا، وقالت إحداهن: هذا ولد بدو ليس ولد حضر، وكنت أعرفها وهي لا تعرفني، وكانت عقيم لم تلد فقلت هذه الأبيات:
امس الضحى روحت ادوَّر ذلولي ... وقت الشتا وناعم البرد يصلان
وأنا أحمد الله يوم لبست النعول ... عن الحفا والبرد والشوك وقان
يوم انه صار الظهر جيت النزول ... لقيت بالمنزل حريم وورعان
سلمت عليهم ميرما اوبهولي ... واضيافتي يوم هدَّوْا الكلب سحمان
قلت:
أنا مضيع يا الربع افزعوا لي ... قالوا لي انحش لا يتعشاك طوقان
يوم اني شفت الوقع جتني زعولي ... والكلب ينبح بيننا والوقع شان
ضربته بحد البوت ضربا يهول ... قلت: امحشي دمه بثوبك بكرهان
يا أم البريم الزين عرض وطول ... محشي دموع الكلب من فوق الوجان
قامت تصيح وتنتخي بالغلول ... لو أحسايف كلينا الزين ردعان
يا لابس البرقع ابزعمك تقول ... إن الشجاعة بين حرب ومطران
ترى الشجاعة كل من له يطول ... مقسومة من بين حضر وبدوان
كم واحد بالعين ماهو نضول ... ولا يتبين لين يبرز بميدان
يا بنت يا اللي خاطرك به كمول ... ما زان في عينك غير سحاب الاردان
والله من رجل افعاله تهول ... يظهر اليا حمي الغي بين الاقران
الشايب واللي تو عمره كهولي ... كلٍّ تميز لي التقى وسط فرسان
لا تعذر بين الناس دون الفعول ... ياللي حليلك بالخلا يتبع الضان
زينك وجرمك ما حصل به انفول ... وزوجك هثيل عيشته جمع ضبان
ما به شجاعه بس جرم وزول ... يا الله غنمتي من هل الضين رعيان
стр. 1233
ما به مراجل حول بيتك يدول ... من كبر حظك ما حصل منه ورعان
ياحسرتك يا بنت رجلك هثولي ... دائم حوالي البيت يرجع بنقصان
قعدتي بحسره وزوجك هبولي ... وظيفته بالوسم خصاي طليان
من حصل الطايل بفعله يقول ... والنذل مثله ما نعده ولا كان
قال عبد الله بن علي الجديعي:
هذه أبيات محاورة مع أم سالم وهي طائر بري مغرد يغني وقت الربيع فيطرب ويعجب فقلت:
يا أم سالم وآهنيك بالحماده ... طول يومك بالطرب مع النشيد
لي ضواك الليل نومك في كتاده ... ما يهمك لا قريب ولا بعيد
والجديعي ما تهنا في رقاده ... بس يوم طول ليله بتعديد
يا أم سالم بادليني بالعباده ... واطلبين اللي تبين من المزيد
هاتي ذنوبك وحطي زياده ... وتحمل كان باقي لك رصيد
واعطيك اذنوبي من حالك سواده ... مثل جبال اطويق والعد العديد
قالت:
واعذابي يالجديعي والقراده ... من ذنوبك دائم هن بالمزيد
انته تحسب يوم اغني بي فساده ... ما دريت انه اوراد وتحميد
يوم اجر الصوت من قلبي إفاده ... اطرب السامع وانا قلبي سعيد
الطرب وقت الخضار من السعاده ... وانت اذنوبك ثقلهن مثل الحديد
مير عندي لك نصيحه والافاده ... اقصد اللي عنده انفاس العبيد
قدم التوبة تجب الذنب عاده ... من كريم فاعل ما هو يريد
يا ام سالم بادليني بالركاده ... ابي حسن الصوت مع حلو القصيد
كل يوم بالطرب انتي استاده ... تروجعين الصوت باللحن الجديد
قالت:
стр. 1234
شيب عيني كان انه احساده ... غابطن يا شين في كثر تغريدي
صوتي اللي تسمعه ما هو اعناده ... لي طر لي قمت اروجع بالصعيد
وانت يا المسكين حبك للوساده ... ما بقليبك للهوى شي يفيد
يا أم سالم سامحيني والافاده ... كيف طاب ولاني مستفيد
من يصيدك مثل من صاد الجراده ... صوتك الرنان والباقي زهيد
قالت:
امسك الطاروق وخلن للقراده ... اثرك المكار والنذل العنيد
هازك الشيطان وصاير لك رفاده ... تي تزرن يا الجديعي بالوريد
دون روحي والعلم الوكاده ... وام سالم عنده الراي السديد
قلت: معروفه يا ام سالم بالشراده ... كم حلال ضاع بأيام الحصيد
انتي اللعوب ولعبك به نكاده ... ملهية الرعيان بايام الشديد
قالت يا الجديعي واشين البلاده ... لا تكلف ما والله تصيد
آخذةٍ حذري ولا لي بك عواده ... والطمع ما ينفعك لوبه مزيد
قلت:
يا حلال السحت ما لي بك اراده ... اطمنني لا يجي قلبك رعيدي
كل هذا الخوف وانت بك شداده ... تكتمين الصوت بالبر البعيد
قالت:
الله العالم بما تضمر عباده ... والطلب راعيه يهتم بالأكيد
وانت يالمغرور ما عندك جلاده ... وقتك اللي راح ما هولك يعيد
قلت:
اتنازل يا ام سالم ما ابي لك قصاده ... انتجع البراق والمرعي الجديد
انتي مثل التبن ما يسوي حصاده ... لا ضواه البرد بايام الجليد
قالت ابرك الأيام واتحالفك السعاده ... وام سالم ما تبي شوف البليد
من عرفتك وانته في حلقي اكراده ... فارقن، خل اتهنا في مديدي
стр. 1235
قلت:
طالب منك السموحه والوداده ... والاقي مفتوح من دون تحديدي
نبي راس المال وانخلي الزياده ... قربي لمي على شان استفيد
قالت جيتني بالدين واحسبه زهاده ... واثرك المكار ممهون الكتيد
اثرك الصياد ما جيتن عياده ... توي ادري انك الضد اللديد
من عادة الصياد في كثر الجحاده ... داسّ البارود من حدر البديد
قلت لقمة الصعلوك ما فيها زياده ... غربلك مولاك ما بك لي نجيد
بس ريشك والباقي قراده ... وش ابي بك جعل بومك ما يعيد
قالت:
استمع لصوت لي جبت الاعاده ... وانتزح عن ماكري واسمع غريدي
وانتبه لي كان تبغى للافاده ... نزل البارود عن كتفك بعيد
قلت خلي بالك يا ام سالم بالهواده ... طاب الكيف ما بي لك مزيد
كم عمار صار للمبنا نفاده ... اطربي بغناك والفال الحميد
صلاة ربي عد رمل بالحماده ... على النبي الهاشمي أزكى العبيد
وقال عبد الله الجديعي في الثور:
الثور غربلني وبيح كنيني ... ولاهوب يفهم كان ودي احاكيه
هو غاية المطلوب ثور سمين ... وهو منوة الجزار يقضب علابيه
كد قلت له ياثور يا هالمهين ... كم مرة لي جيت زرعي توطيه
بتله تحوم بوسط زرع ثمين ... شي تمرغ به وشي بترعيه
حطيت لك خبز وقت وطحين ... تشمه عند خشمك ثم تمشي تخليه
بتله تدلل مثل خطو الجنين ... يذكر لديد أمه ولاهوب ناسيه
ودي تعدل زين خل الرنين ... شرب الحليب الزين لياك تطريه
واقصر لسانك لا تجيب الحنين ... كثر الثغا يا شين دائم تواليه
стр. 1236
لي صار تالي الليل صوتك يبين ... ما غير تعاقب هالثغا وين تدعيه
قال اثرك مسيكين ولا انتب ذهيني ... اللي يبي حقه تغثه وتوذيه
امي لبنها بالبلاعيم زين ... والصبر لا تبلان ما نيب قاويه
القت هو والخبز عقب اللبين ... تراي ما احبه ولانيب باغيه
ولا نيب كايد انعشن لو شنين ... تكفا ترى المعروف ينكس لراعيه
عمري ثلاث شهور ما هي سنين ... وشرب اللبن لو قلت مانيب ناسيه
قلت انثبر ماهيب هيف ولين ... الرباط في يمناك لازم تصاليه
يما شربته يا النذل عند عيني ... تشرب وانا كبدي تطشطش بتاليه
خلك تشوف الغين يا الثور شين ... كم مرة حقك يغبا ولا آجيه
احط لك خازوق وحبلا متيني ... وازويك برباط متين تصاليه
قال:
طلبتك بالمعروف ولا انتب تلين ... هالحين عندي علم لازم تمشيه
أمي لبنهالي ولا لي قرين ... واللي يجيك من اللغا لا تخليه
قلت:
انا وياك الشرع يا هالمهين ... كلِّ على ما قال حقه يكفيه
انا حسبتك طوع منتسب لعين ... واثرك حلال القوم كلِّ تلاغيه
قال انت ما حسك نقوص تجيني ... تبي اللبن والثور تكرد علابيه
دام الرضاعة مدته لسنتين ... وانا ثلاث اشهور تقول بيزيه
شوري عليك اخلص ولا تصير شين ... ترا الطمع بنكس على راس راعيه
يسدني اليا حصل وجبتين ... وانته تهنا لا بقى لك تواليه
قلت تخسا ما نعترف لك بشين ... وسن اللبن لازم نخلعه ونخليه
قال اجل سلف والمغبا يبين ... باكر وعدك الشيخ واسمك محاكيه
يوم جينا عند الشيخ ربي يعين ... قلت انتبه يا شيخ خصمي وداعيه
هالثور غربلني وبيح كنيني ... شرب اللبن والزرع خرب كلاليه
ذاله ثلاث سنين وهو مبتليني ... يقول لي حقا ولاني مخليه
стр. 1237
يقول انا صغير السن ولالي سنين ... يبي اللبن يا شيخ مانيب قاويه
التفت عليه الشيخ قال انت وين ... اللي كبير ما يحبه ويطريه
قال انت ما تدري عن اللي يجيني ... هو عمر ثور عاش من دون تدليه
اما رضعت الحول ما صير شيني ... حتى علفهم شين مانيب باغيه
الناس يحطون لدبشهم حنيني ... ومكعبات واردات وترفيه
وأنا عشاي اتبين ولاهوب زين ... ورباطي ثقيل كل ليلي اصاليه
وامي تحبين دائم هي تبيني ... وهم الذي شربوا لبنها وانا ابيه
الشيخ حل المسئله بالهوين ... الصك يطلع ثم تلقا الذي فيه
واشترك الشاعر عبد العزيز الهاشل هو وعبد الله الجديعي الشاعر في زرع في غويمض، فكان الجرذي والمراد به الجمع (الجراذي) وهي ذكور الفار البريَّة تأكل من بذره وتحفر عن أصوله، فقال أبو هاشل يخاطب الجرذي:
هَيَّا تبين كان عندك نغاميش ... الله عويني و (الجديعي) خشيري
قال: انت هَيِّن لو تكلمت بالريش ... مير البلا هذاك رجلٍ بصير
وانا ان نحرني انا خاف ما أعيش ... هَدَّم بيوتي ثم حَوَّس مريري
من العداوة ما عطان العراميش ... عيا على اخوانه ولو هو الصغير
لو هو عطان العلم من دون تشويش ... كان اختفي وانحاش عجل المسير
وإن جان بعنف ما نفعني بخاشيش ... وإن كان هو زعلان خله يطير
стр. 1238
والَّا انت مسكين وتوزيت بالهيش ... لو كان خطو اليوم موسك شطير
وقد أجاز الجديعي هذه القصيدة، فقال:
حسبت يا الجرذي والى الزرع قسمين ... قسم أكلته انت وقسم مترادي
ما تنقلع لاهل الزروع القويين ... اللي نواحيهم وساع بعاد
حنا مساكين وعن الدِّين عجزين ... وانت الذي حديتنا للنكاد
* * * *
قال:
ماجيت زرعك مير اشوفك متحدين ... انا عزيز النفس مير انت غادي
وش لون شغلك باول الوقت تونين ... وراك ما تصبر إلى قرب الحصاد؟
حقي عليك انك تعز من تقهوين ... واتلا ألتلاوي تبادرن بالطراد
وهقك خشيرك قال حنا قويين ... كان الجدى الجرذي فانا سنادي
اول فتوح الخير وهو متبلين ... كم مرة لي شافني جان عادي
لي شافني امشي قام بالحلت يرمين ... وشوا عيالي لين صاروا رماد
كني نطول وسط بيته موافين ... وألا عدو للجنود البعاد
مير، اجلدوا ولا تصيرون نذلين ... لا تثورون الحرب من دون بادي
خلوا انترافق نترك الزين والشين ... ترى ابرك الساعات ساعة الركادي
الزرع واجد والجراذي بهن دين ... ما يأكلن شي حرام وكاد
قال:
أنا مريض من خشيرك مكوين ... يوم هو يشب النار وقت البراد
قلت:
تراي اعرفك يا الحرامي لي سنين ... الهرج لين والفعل لك معادي
كم مرة لي جيت مرعاك يكوين ... كل الذي من حول بيتك مرادي
ما اقبل كلامك لا تغثن وتوذين ... وش لون اطيعك وانت بالزرع بادي
مير انقلع عنا ترى لك اسبوعين ... وإن شفتك حول الزرع جاك الوكادي
قال:
стр. 1239
لياك تهددني تراكم مهزوبين ... اركض وانا وراك كان انت عادي
لعاد دم عيالنا عندكم وين ... والدم لي جا الحق مهوب غادي
عيالي ستة واخوتي حول ستين ... نبي القصاص وخل عنك الدوادي
وأنا يدي عابت من اللي معادين ... شريكك اللي ضارب بالهوادي
دم الجراذي ما يهدَّر بلا شين ... مسكين يا اللي صار ماله جلادي
وإن كان تريد الحرب حنا مسلحين ... كم فارس نرميه وقت الطراد
والزرع لي حقي بليا تثامين ... غصب عليكم بالرضا والنكادي
نزلتوا على بيتي سواة المجانين ... وذبحتوا عيالي ظلم هذا الفساد
صلاة ربي عد ورق على تين ... على النبي ما سال بالوسم وادي
هذه الأبيات مرادّ من العنز:
عنز شريته للبن والصخين ... مقدار حلبتها الضحى قدر صاعين
والحلبة الأخرى تجي طاستين ... الله يحرسه عن عيون الحسودين
عندي على ذا اشهود بالمكذبين ... مع العفو لي صاروا الناس سمحين
نخض لبنها بالضحي مرتين ... والزود لعياله ولوهم كثيرين
وإن جوا ثلاثة انخفف الحلبتين ... على شان تيسه ودنا ينتعش زين
وإلا بناته عندها جفرتين ... حيث أنهن سمحات ما يطلبن شين
لا شك تيسسة صار جفر ذهين ... ينطل من امه لي غفلنا ولاهين
مسكته قلت اسمع يا بوخصوتين ... وش هالتصرف يوم ترضع بديدين
قال انشد امي هي تعلمك بالزين ... حيث انها تبخص لحال المصغرين
أنا وخواتي كلنا مرغدين ... وامي هي اللي ترضعن لين تروين
رجعت يمه قلت يا لعنزوين ... وراك يا عنز الودر ما تعدلين
التيس وش حيثه يزود بشين ... حرام عليك أن كان له تي تبرين
قالت اصغير لي لحضته اليني ... واللي يجيه الزود كله حواقين
أصل خواته قبل ذا سامحين ... حقوقهن نلقاه لي سار بعدين
أثره تحب التيس يا السامعيني ... زعلت علي تقول وراك توذين
стр. 1240
وراك اتفرق بين اعيالي وبيني ... وانا وعيالي بالموده على زين
قلت:
انا بلاي الحين ماهوب زين ... والواجب انك بينهم ما تحيفين
ترى الولد والبنت بالكفتين ... لولا العدل ما صلحن الموازين
قالت لياك تلومن لي لحظته بعيني ... حب الولد بالقلب دائم يبارين
اخاف يطول الليل وانسى جنيني ... همن يجوع ودمعة التي تكوين
والا خواته يرتكن للسنين ... متعودات ما يجوعن بيومين
هذا العلف عند رووسهن جايبني ... يسدهن وطبيق لياك تونين
* * * *
قلت المكر والحيف توه يبيني ... وانا حسبتك يا حلالي تعدلين
قالت:
اسمع كلاما يوم اقوله ثمين ... انا زعلت وصافي الهرج بعدين
حرام عليك إن كان تشرب لبيني ... واتلا التلاوي عند تيسي اتخطين
أطووا اسقاكم لوتبون الثميني ... خلوه توليدي على شان يرضين
قلت الدوا عندي اخذته ابيميني ... اقطع اجرانه يا حلالي بسكين
اندور لبن واثره التيس المهين ... واتلاه يوم انك بديتي اتلاغين
قالت لا تفجعن يا قدوة الغانمين ... حبه بقلبي مخالطٍ للشرايين
خذ العهد مني على كل جين ... ابدي خواته لين ترضى وتعفين
والتيس يصبر من ورا الوجبتيني ... كلش ولاحللت ارويسه يبارين
هذا الصحيح وصافي الهرج ليني ... واللين يهدي لك اصعاب البعارين
قلت:
اللي ظهر من هرجتك وجهتين ... هذا كلامك مير خايف تخونين
وش اللي نقل تيس عن صخلتين؟ ... وش حيثهن يا احول ما هن مساكين
التيس يقول امي بها اليوم عين ... منحوتة عني ولا هيب تبغين
من أول لي جيت يمه تبيني ... تدورن لي ابطيت عنها تنادين
واليوم قلبه صار لمي متين ... كله اسباب اللي من الناس نغلين
стр. 1241
قلت انثبر يا التيس خلك حزين ... ماسدك اللي فات تبلع بطنين
قال ايه ما نسلم من الحاسدين ... والوقت ما عمره صفي للمحبين
نبي نعبر وقتناها السنين ... غصب عليكم يا وجيه المعادين
قلت:
تشوف عقب أيام كأنك سمين ... أن واعد الشلة على المطرح الزين
هذا جزاك ان كان عندك رنين ... عقب الدلال اتشوف حوف السكاكين
أبيات مساجلة مع الديك وكثرة، أذانه بالفاضي وهو لا يصلي:
يا الديك لا تذن على غير توقيت ... لي صار وسط الليل تصفق بجنحان
والياصار بعد الشمس قمت وتعليت ... من فوق جدار هم قعَّيت الأذان
تذن ولا صليت يوم، ووضيت ... وشلون شغلك صاير يا دجاجان
قال:
الذاني على الترتيب مازدت واخطيت ... أوقط النايم الي صار كسلان
مانيب مثلك دائم كود تزنيت ... اليا سمعت آذان تقول وش جان
انا الي جا الوقت سبحت واديت ... جميع ما حطه علي رب الأكوان
مناب مثلك لي اذن الفجر ونيت ... تمكن غطاك وتقول تراه غلطان
قلت:
بلاك ما تتعب ولا لك ملافيت ... لي جاك وقت الليل ويلاك تعبان
اكبر همومك بالمشاريق والبيت ... تقضي حياتك وانت فرحان طربان
قال انت يا مسكين وش بك تبليت ... هذاي اركض كل يومي وبلشان
لي صار اطلوع الشمس للرزق مديت ... الأحق معاشي دامي الليل ماجان
وإلى ضوان الليل جيت وتغبيت ... اخاف من الثعلب يصيدن اجويعان
مانيب مثلك دائم الدوم عفريت ... ترقد إلى حاليل بادناة ماكان
قلت:
هماك كل اللي دائم تصاويت ... من يوم تغاب الشمس لما يصير فجران
ولا اذكر لي مرة قبل صليت ... تامر ولا تنهى على غير برهان
стр. 1242
واكبر عيوبك باينه لو تخفيت ... غسل الجنابه ما تعرفه ولا كان
اصلك دجاجه لو كبرت وتربيت ... اكبر اهمومك راتع حدر سيسان
قال انت مقرود ولا عمرك اوحيت ... راع المثل يقول تراك وهمان
اضرب لدربك واتركن لو تراديت ... كلٍّ بها الدنيا تقفاه الاحزان
قال الجديعي: مرة وأنا زارع مع أبوهاشل في بلدة غويمض وكان عندنا جراذي، وفي مرة يوم تغدينا وبقي منا لجم ورز قام أحد الأخوة ووضعه عند بيت الجرذي يقول ابيه يسمن حتى يأكل زرعكم من باب المزاح فقلت:
اشوف جرذيك يابوهاشل تمدن ... عاف الخضار وصار ياكل مصافيق (١)
حصل معازيب على الكيف ... والفن كل يوم ثالث جايبين مطابيق (٢)
قاموا عليه بقولهم كسود يسمن ... من شان يرعي زرعنا مع صعافيق
امن معاشه وقام بالزرع يدفن ... لي شاف زول قال جابوا مراقيق
يالربع لا تبطون كلش يسدن ... اليا حصل مطزاز عند فكة الريق
ابرك من الهاشل عن الخير صدن ... من بد الجماعة هو يحدن على الضيق
لي شافن ابي اظهر من البيت ردَّن ... معه عصاه وحاجرن ما اقدر اويق
قلت انثبر بالنذل ايديك كلن ... من حصدهن للزرع دائم ولا تليق
وقال عبد الله العلي الجديعي معلقا على قصيدة صديقه الشاعر عبد العزيز الهاشل في الدلة:
الدلة اللي كيف ثارت عليِّه ... خلتني ما أميز ولا عندي أفكار
جاوبتها لاشك هي قمبزيه ... انا وربعي كلنا مالنا كار
الله يدافع مانعرف الطرِّيه ... ما نميِّز الشينه من اللي به بهار
تقول لراعيها ربوعك رديه ... ما عندهم فرق من الثلج والحار
стр. 1243
لا عندها عز ولا مقدريه ... لا شيمت ضيف ولا شيمت جار
لي صار ما هنا شيمة او حميه ... ولا نميِّز الصايب من اللي به العار
تحط لرجلينه مراقي قويه ... وتسرع تجاوب كان فيه عندها أشعار
* * * *
ذا له ثمان سنين ماله خويه ... ما غير لحاله كنها بومة الغار
من شاف رزتها يقول: خلويه ... وطباقته مجموعة تقل بصرار
والقرط منعاج تقول محنية ... والا ذنب ذيخ عليه الدهر مار
له عروة من التنك بس ليِّه ... ومصبها لوهو لحمام ما دار
وباقي حديده مجمع من خثيه ... واكرم السامع من الشين وأقذار
تضيق الدنيا لوهي فضية ... ونخرب العامر ولو صار ما صار
حلفت انا أيمان ماهي شويه لو أنها ملكي فلا تطبّ لي دار
العاد عريانه وكله ياذيه ... وباقي عذاريبه جيشات وكثار
لو أن راعيها يبيعه عليِّه ... حطيتها حدر الكفر حين ما دار
صنعة عليمي ما يعرف القْدِيه ... ما حافها بالصنع شاطر وبيطار
وقال الجديعي في السرعة في سير السيارات:
يقول اللي شاف الهول ... شايب راسه قبل الحول
من حوادث السيارات
كل اشوي مرتاعين ... من لجة ها الجذاعين
اليا سمعوا إسعافات
كل شوي صاح الصيت ... وينه رايح؟ فلان ميت
وآشين والله موت الفجاة
لا تسرع الي ركبت ... ما نفعك اليا قلبت
او قالوا فلان مات
لا تسرع مالك فخر ... ناظر لو يضرب كفر
стр. 1244
وش عندك من الحيلات
ما غير تجيك الندامه ... لي خالفتك السلامه
همن قالوا: سلامات
أو تبقي معوق بالبيت ... لانتب حي ولا ميت
تقرع سن الندامات
ويش اللي حدك تطير ... ما انتب عاقل أو بصير
يوم تهلك نفسك بسكات
اردع نفسك لا تطاوعها ... الفخر للي صانعها
مالك فخر بالصنعات
أنت يقال لك سايق طاره ... على كنب وبغماره
ولا تفتخر بالسرعات
لي صرت بالخط السريع ... لي قال اسرع لا تطيع
لا تلحق نفسك شمات
اليا مسكت الطريق ... ريح نفسك لا تضيق
وادع ربك بالسمات
السرعه كله ندم ... بما صدم أو عدم
لو سمعت عدة مرَّات
تطلع تدور لك عازه ... همن يرجع بك جنازه
وانت السبب بالوفاة
لا تأخذ السلامه عاده ... خذ الحذر وهي زياده
ناظر كثر الوفايات
امسك حبك في مجالك ... لا تبيِّن للناس هبَالك
تبدي تأكل مطبات
لياك تجيبه شطاره ... تعمَّد قطع الاشاره
стр. 1245
هذا يسمى دشارات
إليا مسك المرور ... تبدي تلفَّ وتدور
وتجمع لك حيالات
واكبر من ذا لي صدمت ... والحادث صار سببه انت
وقعت غيرك في بلشات
هذا ان كانك سلمت ... أو تدهورت وعدمت
صرت بغيبوبه ساعات
لو انه ما به زحام ... قطع الاشارة حرام
لا تحط نفسك في ورطات
لا تطاوع نفسك وتهاون ... الواجب منك التعاون
مع الشيمه والمروات
لياك تغامر وتصاقط ... تحلت الموتر وتنابط
لا تحسب هذي شطرات
السرعه هي والتفحيط ... لا تحسب انه بسيط
وآخرتها تجي نكبات
رح للمستشفى لك ساعه ... تشوف الهول والفظاعة
كله حوادث السيارات
أحد كسر واحد فلاق ... واحد جرحه ما ينطاق
واحد خلطه بالثلاجات
حط أسبابك وتوكَّل ... واسأل ربك ولا تغفل
وهو اللي عنده النجاة
стр. 1246
عرائس الشعر:
عرائس الشعر العامي جمع عروس وهي الفتاة الجميلة التي لم تتزوج وإنما هي تبحث عن زوج، فيعرض عليها الشاعر طائفة من الأزواج، واحدًا بعد الآخر يذكر مزايا كل واحد وعيوبه، ولكنها تصده وترده تريد غيره، فيكرر لها ذلك حتى يريد الشاعر أن ينهي قصيدته التي أغلبها من القصائد المربوعة التي تكون ثلاثة أشطار منها على قافية واحدة، والرابع على قافية أخرى هي لازمة لكل القصيدة أو العروس كما يسمونها.
فإذا ما أراد أن يصل بالقصيدة إلى منتهاها ذكر لها محاسن الرجل ومزاياه فتقتنع بها وتقبله زوجًا لها.
وتلك العرائس الشعرية معروفة منذ قرنين، أو نحوهما، وقد كنت عهدت صديقنا محمد بن حمد العمري ﵀ عازما على جمع عرائس الشعر هذه مع قصائد أخرى في العجائز من النساء - جمع عجوز - سمى كتابه (العرائس والعجائز) ولا أدري ما فعل الله به، وإن كان يغلب على ظني أنه لم ينفذ ذلك.
وقد أسهم عبد الله الجديعي في نظم عرائس الشعر، بل جدد فيها كما سيأتي.
قال:
جتني غزال شوفها يدهش الروح ... متزينه متشكله شكل بوضوح
قامت تهارجني مع الهرج بمزوح ... وانساح بالي يوم دلت تحاكين
قالت انا ودي اوصِّيك يافلان ... تفزع لنا يا صاحب الخير باحسان
стр. 1247
الوقت هذا شين من بد الازمان ... واخاف ما القي به صديق يصافين
ودي تدور لي من الناس رَجَّال ... الا هوب لا حرفي ولا راعي اعمال
لا تاجر بالحيل ما يزكي المال ... دايم هروجه بالدرر والملايين
قلت: ابشري باللي يسرك ويرضيك ... اروح بك لم الجماعه واوريك
خوذي على كيفك ورايك وطاريك ... تخيري منهم على اللي تريدين
هذا بجنبي واحدٍ تو ما شاب ... شيب الصبا ماهوب عذروب أو عاب
يفتك ربعه بالملاقي ولا يهاب ... مري عليه كان ودك تشوفين
قالت:
اهب حظي على طول دهوان ... شايب كبير ما يبي زود نسوان
همه صلاته والعباده على شان ... يغفر له المعبود في ماضي سنين
قلت:
انا ما ناب لمك ولا ابيك ... وش لي من الفاده علشان أبي اوذيك
стр. 1248
والراس منها مثل شكة الديك ... روحي لربعك كان ربعك كثيرين
قلت ابشري لقيت صاحب بضايع ... دايم بوسط السوق شاري وبايع
يجيب لك من كل شكل روايع ... ويحط عندك كل ما انت تريدين
قالت:
خله يولِّي، لا يجئ حول داري ... اللى بساعه يطرى له ثمانين طاري
يصبح على حيله يعدّ المصاري ... عساه كسبان علشان يرضين
قلت:
هذا المقاول كان تبغين فنان ... يضبط اعمال البيت تفصال واتقان
ويحط لك قصر رفيع علشان ... يحطه بالصرفه على ما تريدين
قالت:
حظي ردي دائمًا لي عنيد ... يما علي شايب والا فزيدي
من بد حظوظ الخلق فرَّط من ايدي ... عيّا يقوم، اهب كيف هو متبلين
стр. 1249
قلت: اجل هذا صاحب البز بلهان ... شوفي السانه دايم تقل ميزان
احيلسًا واميلسًا تقل فستان ... ويجيب لك من كل نوع تعشقين
قالت:
اللي يبيع البز ما فيه نوماس ... يجيه من المخلوق من كل الاجناس
لي جا من الدكان والاه منحاس ... دائم يهوجس كنه مضَيِّع شين
قلت:
اجل هذا اللي على الكيف والبال ... هذا قوي النفس شو فيه دلَّال
يحرج على الخضره ويجمع له اموال ... دائم بداره ما يسافر ولا شين
قالت:
رديتي للي يقلِّب فلوسه ... لي قلت له شي يقول معكوسه
يبيع القرع ويبيع صناديق كوسه ... بتله على الخضره يقلب كراتين
قلت:
اجل اروح بك لسوق التجاره ... فيهم كرم واجواد واهل خياره
стр. 1250
تخيري منهم على كل شاره ... ولا لك عن الاجواد وين تبي تروحين؟
قالت تجار اليوم ما هي على الكيف ... لابد بهم خونه ولابد بهم حيف
وأكثر تجار اليوم يرابي على السيف ... ما احبهم لوهم تجار غنيين
قلت:
اجل امشي لم صاحب المعارض ... اللي عليهم الخير كثير وفايض
طباطا للبيع مابه نقائض ... واظن هالمره من رايي تطيعين
قالت:
ما ني قمام بالمزابل تلوفِ ... ترى الدنيا للى كثير الحلوف
ولياشري وراح مهوب يوفي ... يقلِّب السبحه ولا يوفي الدِّين
قلت اجل هذولا خراريز واجواد ... فعالةٍ للخير والسير منقاد
اللي على المخراز درب ومعتاد ... دايم حوال البيت ماهم بعيدين
قلت: ونعم، مير تالي اجاويد ... ما يحرك الرابض ولا فيه تمجيد
стр. 1251
واظن ما له رغبه يبي تجديد ... همه شغيله مدبح بالدكاكين
قلت:
اجل امشي لاهل العرف والكار ... دقاقة للهيل، شبابة النار
قولة تفضل دائما عندهم كار ... كل يعرفهم عند حراج البعارين
قالت:
أعرفهم زين ولا هم ضمايم ... مير يشغلونن دائما بالعزايم
من ينطح المطبخ على الدوم دايم ... زيدي بعشانا عندنا زود ضيفين
قلت:
اجل أمشي لم ذباحة الحيل ... اللي يبيعون اللحم ما بهم قيل
انشدي تراهم من خيار الرجاجيل ... ولابد بالرجال خمعه على الطين
قالت:
رديتني للي يغشون واكذاب ... اللي يبيعون الركب هي والاذناب
يجمع عظامه لعميله والاجناب ... واللي يفتش عندهم ياخذ الزين
стр. 1252
قلت:
اجل امشي يم صانع ونجار ... حريص على الصنعه وشاطر وبيطار
يومي بقدومه تقل يضرب الطار ... والا صناع يحب رب المواعين
قالت:
خله بشغله مشني في طريقي ... الصانع والنجار ما هم رفيقي
كل بشغله دايما ما يفيق ... ما هم يمي مير ودي تمشِّين
قلت:
اجل امشي لراعي بقاله ... اللي يبيع ويشتري في حلاله
من كل نوع حايزينه لحاله ... ويجيب لك من كل شكل تريدين
قالت:
راع البقاله دايما ماينام ... الشغل عنده دايم الدوم حامي
حليلته ما تهتني بالمنام ... لي جا من الدكان إلى ما يبي شين
قلت كثر الحكي والخربطة ما تفيد ... امشي معي اوريك راعي حديد
قول ومعرفه وراي سديد ... انا ابيك تختارين ترى الزين باللين
стр. 1253
قالت:
اللي يبيعون الحديد بهواهم ... كلِّ يقول اصلي وانا ماهقاهم
بَرِّقْ تشوف الفرق عند قصراهم ... واخاف ما تحصل عن الميه اثنين
قلت اجل امشي لم بياعة الزين ... اللي يبيعون العدن هم هل الدين (١)
اللسان ليِّن وترى الفرق باللين ... واظنهم اجواد وانت تعرفين
قالت:
ذولا زباينهم عجايز وشيبان ... وبياعة بالغرش ماهمب شجعان
والفرق ماهوب شوي لا تصير غلطان ... كثيرهم بالدين ماهمب حريصين
اجل امشي لم اصحاب الدفاين ... اللي يعرضون السلع للزباين
وسط المعارض شوفة العين باين ... الكل جاهز ما يبي زود تبيين
قالت:
بيس المحل وبيس ذيك البضاعه ... ما عندهم عز ولا به شجاعه
стр. 1254
من كل نوع جايبنه خلاعه ... محلهم ما يدخله غير نذلين
قلت:
توي لقيت اللي يوافق على الكيف ... واظنهم ماعندهم مكر او حيف
اللي يبيعون الذهب بالمشانيف ... ما مثلهم ان كان ودك تعبرين
قالت:
قل للذهب واهل الذهب لا يعيدون ... لا تحطني في جوز ناس يغشون
أكَّالةِ يشرون من يبيعون ... يفخر إلى منه ضرب له مسيكين
قلت اجل امشي لم بياعة الطيب ... اغاديك ما تلقين فيهم عذاريب
اهليةٍ مادك فيهم اجانيب ... اللي روايحهم تسر المحازين
قالت:
رديتني للي يبيعون بالفقس ... يفرح إلى منه سمع طاري العرس
هاذي والكل منهم ردي نفس ... ما يشتري منهم غير عجز وبزارين
стр. 1255
قلت:
ضيعت لي وقتي وانا احوم بالاسواق ... واظن ما تلقين من فوق الأطباق
هيا معي تخيري لك بسواق ... حتى معه لكل ديره تروحين
قالت:
اللي يكدون السفر مانبيهم ... دائم اخبار وكثره الهم فيهم
ان سلموا من الأخطار فيهم وفيهم ... والسجن مليان بناس برييين
قلت اجل امشي لم راع الحراج ... اهل الغنم ما مثلهم بالبداجي
اللي من تطلع الشمس وهم لجاج ... كل باثر رزقه يركض على وين
قالت:
كل المكر والكذب باهل الدلاله ... إلى بارت السلعه يزود لحاله
كم واحد غشه وروح حلاله ... جداع يحلف ل بن بالكذب يرضين
قلت: اجل امشي لم بياعة الأفران ... وعندهم من الأفران اشكال والوان
واظنهم بالصدق وبعضهم اخوان ... تخيري منهم تري واجد الزين
стр. 1256
قالت:
اللي يبيعون الثلاجات يغشون ... ان جاهم الرجال دلوا يحلفون
انه رخيص وزين يبي يصقُّون ... مثل اللي ذبح كبشه وللنار بعدين
قلت:
اجل امشي كان بغيتي لك موظف ... اللي تغاب الشمس وهو يتنظف
ومشي على البريد تلقين مكلف ... تخيري منهم عيال نظيفين
اليا فرغ دلا يقلب جريده ... ليل ونهار دايم هم شقيين
قلت:
اجل امشي بك لصوب الاماره ... آموظفيه رجال كله خياره
اظنهم عز ومع العز شاره ... وش عاد هالنوبه ودك تقولين؟
قالت:
ما همني واحد يناظر عقاله ... لي جيت لمه قام يزفت لحاله
كنه على المخلوق راعي جماليه ... ماهمب هَشِّين وللناس بشين
стр. 1257
قلت:
اجل امشي لم راعي الجوازات ... واظنهم اجواد واهل مروات
اللي باعمال الخلق حطوا بطاقات ... ومجودين الناس دايم فطينين
قالت ونعم مير خلهم يؤلون ... الواحد لي شفته والا تقل مسجون
لى جاهم التاجر على طول يبدّون ... ولي جاهم الضعيف يقولون بعدين
قلت:
توني القى لك من الناس رجال ... الموظفين بالبلد مالهم امثال
هم اللي على المطلوب وهم غاية البال ... وإن كان طعت الشعور فلا تعيين
قالت:
الله دخيلك لا ترد الخساره ... رديتني لاهل القشر والقذاره
اللي على المكتب يشب الزقاره ... ما يشيم العاني ولا يشيم الدين
قلت:
اجل امشي لم راع المعارف ... تخيري من هالعيال النظايف
خوذي على المطلوب راع الوظائف ... وكثر التختل ما يجي صاحبه شين
стр. 1258
قالت:
اهل المعارف كلهم ما بهم خير ... وباعمالهم كله يجي زود تقصير
لي جا على المكتب مثل وقعة الطير ... قام يتلفت كنه مضيّع شين
قلت اجل دوك موظفين الزراعه ... الكل منهم نادر بالشجاعه
اللي بذلوا الجهد باهل الزراعه ... ما مثلهم يا بنت وش بك تعيين
قالت:
كان انهم عندك عزيرين ورجال ... لا تجيب طاريهم ترى العقل لي زال
كم حق فلاح جرى فيه الاهمال ... واللي تطرف ينهبونه بلا شين
قلت:
اجل امشي لم بنك الزراعي ... اظن كثر الحكي مافيه داعي
وانا حريص لك وبالخير ساعي ... مري عليه ان كان ودك تشوفين
قالت:
انا بانصحك لا تجي الانذال ... اهل الهوى والجور ما فيهم اشكال
стр. 1259
التاجر يبدونه ويعطونه المال ... واللي ضعيف عندهم ياخذ سنين
قلت:
توي لقيت اللي على العين والراس ... اللي بها فخر وعز ونوماس
المحكمة اللي بها خيرة الناس ... مشايخ معهم أهل الخير والدين
قالت:
رديتني للمحكمه واللواليس ... بها المكر والكذب وهي منزل ابليس
ولا بها غير الردي والمفاليس ... راحت حقوق الخلق من دون تبيين
قلت:
ضاقت علينا ما لقينا لنا باب ... كثر التعب يا بنت والمدح مائاب
تقطعت من كل وجه الاسباب ... واظن هالمره بالهيئة توقين
قالت:
قالت عز الله اني برت بين الرجال ... ان كان الجدا هذولا فانا اقعد لحالي
الوحده اريح من كثير الجدال ... الومر والنهي دفتَّاه مبطين
стр. 1260
قلت:
اجل انكس بك لغرفة التجاره ... اللي حموا اهل البلد بالشطاره
ويخوفون الخلق عند الخساره ... ما مثلها حيث ان اهلها عزيزين
قالت:
غرفة التجاره ما بهم خير يا فلان ... الكل منهم دايم وهو كسلان
نصف البلد ما يكلمونه علشان ... هذا رفيق له وهذولا صديقين
قلت:
ضيقتي صدري وانا ودي ارتاح ... هيا معي تخيري لك بفلاح
عنده نفاه وعنده الهم ينزاح ... خليك بالبستان دايم تحومين
قالت:
راع الشقا ما ينقرب حول بيته ... اليا بغيت تدوره ما لقيته
دايم بروس ودايم في قتيته ... لي جا من شغيله ولا ما يبي شين
قلت:
وش لون شغلك والتعب معك ما فاد ... ضيقتي صدري ثم عفتي الاجواد
стр. 1261
هذي المطاوعه كان تبغين زهاد ... ولا بهم عذورب حتى تعذلين
قالت:
مطاوعه زمانك ما بهم خير يا فلان ... لو يقرأ على متعافي صابه جنان
خله يولي ما بهم عز واحسان ... بياع صلاته لا تجيبه يحاكين
قلت:
الظاهر أنه قلت الحيله اليوم ... قضيتي من الديره ولا فاد بك لوم
حتى أن مخي راح من كثر ما احوم ... هذي القصيم كان ودك تحومين
ثم واصل الجديعي النظم والمحاورة مع عروسه التي عرض عليها أهل القصيم فذمتهم ثم أهل الرياض وباقي البلدان، وقد حذفت هذا القسم من القصيدة لأن فيه ذمًا - على لسان العروس - لبعض أهل البلدان كما هو مقتضى طبيعة العروس في الشعر.
ومن تجديدات عبد الله العلي الجديعي في شعره اختياره فتاتين تكونا عروسين يعرض عليهما من يراه أهلا لهما فتبديان رايهما فيه، ويكون في أول الأمر بالرفض مع ذكر بيان السبب كما هي العادة في عرائس الشعر.
وقد ضمن عروسه هذه أو إن شئنا الدقة قلنا قصة عروسيه الإثنتين كثيرًا من الإنتقادات للدوائر الحكومية وللجهات العامة الأخرى.
وهذا من مقاصد إنشاء مثل هذه العرائس.
стр. 1262
ومن المعلوم أنه يقصد بانتقاده من كانوا موجودين إبان نظم العروسين، ولا يقصد في ذلك كل من عمل عملها فيما بعد ذلك.
قال الجديعي على شبه عروس:
امس الضحى جاني من البيض ثنتين ... هيفٍ على المطلوب بالشكل والزين
قال لي: درب السوق بالأخو من وين ... حنا ترانا نستحي واجنبيات
قلت اللزوم اللي تبنه نجيبه ... السوق ما يخلو، دروبه صعيبه
وانا تراي افرح ولا منَّ ريبه ... اقضي لزوم الناس من دون طمعات
قال:
أنت الذي تراك تقضي اللزوم ... تسوي بنا معروف ولا نحوم
تدور لنا رجال مابه ثلوم ... واحرص ترانا يا السنافي حريصات
قلت ابشرن عندي عيال أواليد ... عيال الحمايل من فروع الأجاويد
عيال على المطلوب قروم مراشيد ... عيال المزارع كان للشي رغبات
الأوله قالت: أنا ما أبيهم ... ابي السموحه لا تحِدَّنْ عليهم
اللي يكدون المره لو تجيهم ... يذكر لنا يوم السنين الصعيبات
والثانية قالت: ونعم بالاجواد ... اللي مضى منهم أجاويد زهاد
واللي بقى يذكر لنا غشّ وعِناد ... ناظر الطماط اللي يجي للمحلات
قلت:
أروح بكن لم البلد والعماير ... واجيب لكن منه العيال النضاير
اللي يبيعون الذهب بالدراير ... أحسن من الفلاح وأهل عمارات (١)
الاوله قالت: تراهم يغشون ... لي جيتهم دهووك دلَّوا يحلفون
بهم جشع والا تراهم يعقبون ... لي جاهم الجاهل خذوا منه زلات
والثانية قالت: بعد فيهم عيوبْ ... لي جيتهم بياع قالوا: به ضروبْ
إلى جبتهم تشري يقولون محبوب ... ذي دقة قلان اللي على الناس رغبات
стр. 1263
قلت:
اجل عندي من هل البز شجعان ... وأهل وفا وصدق وبعضهم إخوان
ولا أمدح لكن على غير برهان ... وآزينهم اهل وفا وأهل مروات
الاوله قالت تراني معيه ... ما أريدهم لو ان ايديهم حفيه
جاني خبر عنهم علوم خفيه ... لا تكثر التكرير ما اشوف رغبات
الثانية تقول: انا ما عرف شين ... ولا اسبهم وهم عني بعيدين
مير انهم بالذكر ناس حريصين ... لا بد بالسلعه يجي سبع بيعات
قلت:
اجل امشن يم سوق التجاره ... ولا يبون لي مدح اهل خياره
اويا رجال نازلين بحاره ... واشيربهم ان كان طعتن المشورات
الاوله قالت ترفق احاكيك ... التجار ذولا بهم شي خافيك
لو يتدين كان شد لي وأنا أعطيك ... اكثر تجايرهم مرابي وحيلات
والثانية قالت ترى فيهم عيوبْ ... يا خذون حكيك واكثر الحكي مقلوب
حكيه على ممشاه ما يبعد النوب ... باعدني عنهم لا تحطن بورطات
قلت:
اجل امْشَنْ يم سوق الصناعه ... عز وشرف وخير وأهل قناعه
والكل منهم عيشته من ذراعه ... يا زينهم اللي نجحوا بالصناعات
الاوله قالت: انا شفت شاره ... اللي بقى منهم محله بْداره
وعيالهم عابوا عليهم النجاره ... الشغله هذي له زمانٍ مخلاة
الثانية قالت انا اقول يا فلان ... اللي يخلي صنعته فهو غلطان
هذي بها فخر وعزّ علشان ... عز الوطن لي صار بيديه شغلات
قلت:
اجل امشن يم سوق المعارض ... الهقوة انه حظ وانتين حظايظ
أهل نصف وصدق والمال فايض ... خوذن على المطلوب لي صار نقوات
الاوله قالت: تراك عندي أخطيت ... احضر إلى منِّك مع العصر صليت
стр. 1264
تشوف وش يجري مع الاجنبي ليت ... لي صار عنده مويتر له سنيات
الثانية قالت إلى جيت عاني ... دَلَّى بهلي بك هلا يا فلان
يبي يصيدك قبل يقضبك ثاني ... عنده قرنبع قال: هذي مغَبَّاة
* * *
قلت اجل امشن يم صاحب البقايل ... هذولا رجالٍ من خيار الحمايل
دايم حوال البيت عند الحلايل ... ماله بعيدٍ دايمٍ بالمحلات
الاوله قالت: ونْعم بالاجواد ... افطن لفلانة كان وده وتنقاد
والا انا مالي بهم مير وش عاد؟ ... ذولا اجاويد وكثر الحكي فات
والثانية قالت انا اللي أقول ... ذولا أجاويدٍ وهم ما أصلحوا لي
يا الله تلفت لا تكثر ملولي ... أهل البقايل ما بهم لنا رغبات
قلت اجل امشن يم سوق الجزازير ... أهل الجزاله والرجال المناعير
اللي يعزون الحلايل بتوقير ... شوري عليكن كان بغيتن كرامات
الاوله قالت تمهل شويه ... خل نْتراود لين نشوف القضيه
المسألة طالتْ وكبرت عليه ... عز الله اني برت بين الجماعات
الثانية قالت: ترفق علينا ... كان الجدا ذولا فحنا هبينا
وش حظنا ها اللي تسلط علينا ... عيا يقوم، إهبْ، بتله بنكبات
* * *
قلت امشن يم اصحاب البعارين ... أهل المراجل ما نبي زود تبيين
انشدن تراهم بالمراجل قديمين ... أهل كرم وطيب واهل مروات
الاوله قالت وانا اشهد على الطيب ... ونْعم بهم وهم الرجال الاشابيب
عز الله انك صادق ما بهم عيب ... اهل كرم واجواد واهل عزيمات
والثانية قالت: مع النعم نعمين ... مير المره ما هيب ترغب كريمين
واهل الوفا دايم على الجود سمحين ... مير اتعدَّر لا يجينا ملامات
стр. 1265
قلت اجل امشن يم أهل المعارف ... اللي بها اجواد واهل وظايف
ولا تكثرن القول ما به نكايف ... تخيرن وانزلن على الزين باسكات
الأوله قالت انا ودي انصحك ... ما ودي لي منك تغيبت نجرحك
ان كان ودك إلى ابعدت نفضحك ... لا تحطنا بين المعارف ببلشات
الثانية قالت: ترى فيهم عيوب ... ما يكمل الواجب ولا يدي النوب
واللي يْدرِّس دايم فيه عذروب ... ياخذ المعاش ودايم فيه غفلات
* * *
قلت امشن يم مكتب اهل الخير ... البلدية اللي رجْاله مناعير
يا زينهم لا تكثرن المشاوير ... انا تراي افرح والاجواد رغبات
الاوله قالت تراك انت غلطان ... اوما كوتك اللي تلاعب بالأوطان
راحت اراضي الناس غصبٍ وكْرهان ... وكم حق مسكينٍ غفل راح بُسكات
والثانية قالت لا تحدن على الضيق ... راحت اراض الناس ظلم وخنابيق
وبأعمالهم كله يجي شي ما يليق ... ما تشوف بعيونك افعال شنيعات
اجتمعن وقالن: نقْدم دعايه ... نبي نروِّح للوزارة شكايه
انهبوا أراض الناس باسم الولايه ... وهي معروفه عندهم بالملفات
الشارع إلى منه تخرب يزقَّتْ ... يسمى هذا الزفت شيّ موقَّتْ
واحدهم مثل الغلث بس يتلفت ... اليا تدمي الناب ما فيه حيلات
إلى جيت الشارع يحدك الرصيف ... تكلف ما تلقى محلٍّ نظيف
تطلع من الديره تعبانٍ معيف ... ضاقت على الأجواد ما بَهْ محلات
لا تقدَّم المعروض مالك نصيب ... مالك سَنَعْ الَّا ان كان لك نسيب
يكتب على الماصه، خلَّكْ قريبِ ... يعطونك لي شبعوا فضال بعيدات
قلت: اصبرن لا تكثرن الطلايب ... ان كان مالكن رغبه فلا هي غصايب
يحرم عليكن اعراض من كان غايب ... وانتن اقصرن شوي لا تصير لجَّاتْ
ردَّنْ وقالن حكيك اليوم مقلوب ... أوانت معطي لك قطعةٍ براس عرقوب
