هذي المطاوعه كان تبغين زهاد ... ولا بهم عذورب حتى تعذلين
قالت:
مطاوعه زمانك ما بهم خير يا فلان ... لو يقرأ على متعافي صابه جنان
خله يولي ما بهم عز واحسان ... بياع صلاته لا تجيبه يحاكين
قلت:
الظاهر أنه قلت الحيله اليوم ... قضيتي من الديره ولا فاد بك لوم
حتى أن مخي راح من كثر ما احوم ... هذي القصيم كان ودك تحومين
ثم واصل الجديعي النظم والمحاورة مع عروسه التي عرض عليها أهل القصيم فذمتهم ثم أهل الرياض وباقي البلدان، وقد حذفت هذا القسم من القصيدة لأن فيه ذمًا - على لسان العروس - لبعض أهل البلدان كما هو مقتضى طبيعة العروس في الشعر.
ومن تجديدات عبد الله العلي الجديعي في شعره اختياره فتاتين تكونا عروسين يعرض عليهما من يراه أهلا لهما فتبديان رايهما فيه، ويكون في أول الأمر بالرفض مع ذكر بيان السبب كما هي العادة في عرائس الشعر.
وقد ضمن عروسه هذه أو إن شئنا الدقة قلنا قصة عروسيه الإثنتين كثيرًا من الإنتقادات للدوائر الحكومية وللجهات العامة الأخرى.
وهذا من مقاصد إنشاء مثل هذه العرائس.
стр. 1262
ومن المعلوم أنه يقصد بانتقاده من كانوا موجودين إبان نظم العروسين، ولا يقصد في ذلك كل من عمل عملها فيما بعد ذلك.
قال الجديعي على شبه عروس:
امس الضحى جاني من البيض ثنتين ... هيفٍ على المطلوب بالشكل والزين
قال لي: درب السوق بالأخو من وين ... حنا ترانا نستحي واجنبيات
قلت اللزوم اللي تبنه نجيبه ... السوق ما يخلو، دروبه صعيبه
وانا تراي افرح ولا منَّ ريبه ... اقضي لزوم الناس من دون طمعات
قال:
أنت الذي تراك تقضي اللزوم ... تسوي بنا معروف ولا نحوم
تدور لنا رجال مابه ثلوم ... واحرص ترانا يا السنافي حريصات
قلت ابشرن عندي عيال أواليد ... عيال الحمايل من فروع الأجاويد
عيال على المطلوب قروم مراشيد ... عيال المزارع كان للشي رغبات
الأوله قالت: أنا ما أبيهم ... ابي السموحه لا تحِدَّنْ عليهم
اللي يكدون المره لو تجيهم ... يذكر لنا يوم السنين الصعيبات
والثانية قالت: ونعم بالاجواد ... اللي مضى منهم أجاويد زهاد
واللي بقى يذكر لنا غشّ وعِناد ... ناظر الطماط اللي يجي للمحلات
قلت:
أروح بكن لم البلد والعماير ... واجيب لكن منه العيال النضاير
اللي يبيعون الذهب بالدراير ... أحسن من الفلاح وأهل عمارات (١)
الاوله قالت: تراهم يغشون ... لي جيتهم دهووك دلَّوا يحلفون
بهم جشع والا تراهم يعقبون ... لي جاهم الجاهل خذوا منه زلات
والثانية قالت: بعد فيهم عيوبْ ... لي جيتهم بياع قالوا: به ضروبْ
إلى جبتهم تشري يقولون محبوب ... ذي دقة قلان اللي على الناس رغبات
стр. 1263
قلت:
اجل عندي من هل البز شجعان ... وأهل وفا وصدق وبعضهم إخوان
ولا أمدح لكن على غير برهان ... وآزينهم اهل وفا وأهل مروات
الاوله قالت تراني معيه ... ما أريدهم لو ان ايديهم حفيه
جاني خبر عنهم علوم خفيه ... لا تكثر التكرير ما اشوف رغبات
الثانية تقول: انا ما عرف شين ... ولا اسبهم وهم عني بعيدين
مير انهم بالذكر ناس حريصين ... لا بد بالسلعه يجي سبع بيعات
قلت:
اجل امشن يم سوق التجاره ... ولا يبون لي مدح اهل خياره
اويا رجال نازلين بحاره ... واشيربهم ان كان طعتن المشورات
الاوله قالت ترفق احاكيك ... التجار ذولا بهم شي خافيك
لو يتدين كان شد لي وأنا أعطيك ... اكثر تجايرهم مرابي وحيلات
والثانية قالت ترى فيهم عيوبْ ... يا خذون حكيك واكثر الحكي مقلوب
حكيه على ممشاه ما يبعد النوب ... باعدني عنهم لا تحطن بورطات
قلت:
اجل امْشَنْ يم سوق الصناعه ... عز وشرف وخير وأهل قناعه
والكل منهم عيشته من ذراعه ... يا زينهم اللي نجحوا بالصناعات
الاوله قالت: انا شفت شاره ... اللي بقى منهم محله بْداره
وعيالهم عابوا عليهم النجاره ... الشغله هذي له زمانٍ مخلاة
الثانية قالت انا اقول يا فلان ... اللي يخلي صنعته فهو غلطان
هذي بها فخر وعزّ علشان ... عز الوطن لي صار بيديه شغلات
قلت:
اجل امشن يم سوق المعارض ... الهقوة انه حظ وانتين حظايظ
أهل نصف وصدق والمال فايض ... خوذن على المطلوب لي صار نقوات
الاوله قالت: تراك عندي أخطيت ... احضر إلى منِّك مع العصر صليت
стр. 1264
تشوف وش يجري مع الاجنبي ليت ... لي صار عنده مويتر له سنيات
الثانية قالت إلى جيت عاني ... دَلَّى بهلي بك هلا يا فلان
يبي يصيدك قبل يقضبك ثاني ... عنده قرنبع قال: هذي مغَبَّاة
* * *
قلت اجل امشن يم صاحب البقايل ... هذولا رجالٍ من خيار الحمايل
دايم حوال البيت عند الحلايل ... ماله بعيدٍ دايمٍ بالمحلات
الاوله قالت: ونْعم بالاجواد ... افطن لفلانة كان وده وتنقاد
والا انا مالي بهم مير وش عاد؟ ... ذولا اجاويد وكثر الحكي فات
والثانية قالت انا اللي أقول ... ذولا أجاويدٍ وهم ما أصلحوا لي
يا الله تلفت لا تكثر ملولي ... أهل البقايل ما بهم لنا رغبات
قلت اجل امشن يم سوق الجزازير ... أهل الجزاله والرجال المناعير
اللي يعزون الحلايل بتوقير ... شوري عليكن كان بغيتن كرامات
الاوله قالت تمهل شويه ... خل نْتراود لين نشوف القضيه
المسألة طالتْ وكبرت عليه ... عز الله اني برت بين الجماعات
الثانية قالت: ترفق علينا ... كان الجدا ذولا فحنا هبينا
وش حظنا ها اللي تسلط علينا ... عيا يقوم، إهبْ، بتله بنكبات
* * *
قلت امشن يم اصحاب البعارين ... أهل المراجل ما نبي زود تبيين
انشدن تراهم بالمراجل قديمين ... أهل كرم وطيب واهل مروات
الاوله قالت وانا اشهد على الطيب ... ونْعم بهم وهم الرجال الاشابيب
عز الله انك صادق ما بهم عيب ... اهل كرم واجواد واهل عزيمات
والثانية قالت: مع النعم نعمين ... مير المره ما هيب ترغب كريمين
واهل الوفا دايم على الجود سمحين ... مير اتعدَّر لا يجينا ملامات
стр. 1265
قلت اجل امشن يم أهل المعارف ... اللي بها اجواد واهل وظايف
ولا تكثرن القول ما به نكايف ... تخيرن وانزلن على الزين باسكات
الأوله قالت انا ودي انصحك ... ما ودي لي منك تغيبت نجرحك
ان كان ودك إلى ابعدت نفضحك ... لا تحطنا بين المعارف ببلشات
الثانية قالت: ترى فيهم عيوب ... ما يكمل الواجب ولا يدي النوب
واللي يْدرِّس دايم فيه عذروب ... ياخذ المعاش ودايم فيه غفلات
* * *
قلت امشن يم مكتب اهل الخير ... البلدية اللي رجْاله مناعير
يا زينهم لا تكثرن المشاوير ... انا تراي افرح والاجواد رغبات
الاوله قالت تراك انت غلطان ... اوما كوتك اللي تلاعب بالأوطان
راحت اراضي الناس غصبٍ وكْرهان ... وكم حق مسكينٍ غفل راح بُسكات
والثانية قالت لا تحدن على الضيق ... راحت اراض الناس ظلم وخنابيق
وبأعمالهم كله يجي شي ما يليق ... ما تشوف بعيونك افعال شنيعات
اجتمعن وقالن: نقْدم دعايه ... نبي نروِّح للوزارة شكايه
انهبوا أراض الناس باسم الولايه ... وهي معروفه عندهم بالملفات
الشارع إلى منه تخرب يزقَّتْ ... يسمى هذا الزفت شيّ موقَّتْ
واحدهم مثل الغلث بس يتلفت ... اليا تدمي الناب ما فيه حيلات
إلى جيت الشارع يحدك الرصيف ... تكلف ما تلقى محلٍّ نظيف
تطلع من الديره تعبانٍ معيف ... ضاقت على الأجواد ما بَهْ محلات
لا تقدَّم المعروض مالك نصيب ... مالك سَنَعْ الَّا ان كان لك نسيب
يكتب على الماصه، خلَّكْ قريبِ ... يعطونك لي شبعوا فضال بعيدات
قلت: اصبرن لا تكثرن الطلايب ... ان كان مالكن رغبه فلا هي غصايب
يحرم عليكن اعراض من كان غايب ... وانتن اقصرن شوي لا تصير لجَّاتْ
ردَّنْ وقالن حكيك اليوم مقلوب ... أوانت معطي لك قطعةٍ براس عرقوب
стр. 1266
تبي تعدَّر دونهم تقل مندوب ... الله كريم وتفترج قبل لحظات
ما تطالع الشِّرَّع بعينك تشوفِ ... الشِّرَّع اللي غاديات رفوف
لي جيت للشارع والى معطوفِ ... يلاحظ الأهداف في كل حارات
قلت العِشَرْ ما فيه خير ومصلوح ... حنا نْدوِّر شغلنا وين نبي نروح
وشوله ندور الشرَّ والشر مطروح ... هالحين على النواب عساكن مويقات
الاوله قالت عساها خفايف ... كان الجدا ذولا فحنا عفايف
ذولا بس رجال ما هنا كلايف ... ذولا يحسبون الشهر للمعاشات
الثانية قالت: تراهم مساكين ... يسحب عصاه ولا يتكلم، ولا شين
حدر الإدارة بالعتب مستكنين ... يروح نهاره والسواليف عَدْلاتْ
قلت: اجل امشن يم الجوازات ... أهل الزكا والجود وأهل الشجاعات
اللي يعزون الوطن والجماعات ... شوري عليكن لا تصيرن عنيدات
الاوله قالت انا أقول شينين ... ما يقدرون الناس لي جوا عانين
ليا بغيت هويةٍ قال: بعدين ... والخلق مجبورة بحط الهويَّات
والثانيه تقول: فيهم كسالى ... لي جيت للمكتب والى بس لا، لا
تأخذ زمانٍ ما انقضى لك مجالا ... بس يتردد يم محل الجوازات
قلت:
أجل امشن يم بعض المدارس ... تخيرن من هالعيال الفوارس
كلٍّ على المطلوب معداه دارس ... كان قولكن فهذي المحلات
الاوله قالت: بهم بس شاره ... بساقة الكوره مثير غباره
يروح عليه الليل ما جا لداره ... والشكل ذا ما للبني فيه رغبات
والثانيه قالت وانا اقول: ياليت ... يروح عمري ما برجلي تهنيت
يقضي شبابه مع عيالٍ مناعيت ... واقعد لي حْوَّل بتله مهَبَّاة
* * *
قلت:
стр. 1267
اجل امشن يم محل الزراعه ... اللي نوادر رجال وأهل شجاعه
اللي يعزون الوطن كل ساعه ... ايضا مع الفلاح لهم محاماة
الاوله تقول خلن بفالي ... لا تردني للي كثير الجدال
كان الجدا ذولا فأنا اقعد لحالي ... راحت اراض الناس كله نهابات
الثانية تقول: عندي شهاده ... قسم الزراعه ما حصل فيه فاده
انسفهم على يسراك مالي إراده ... لا تمرهم خل الزراعة مهيَّاة
قلت:
اجل امشن يم أئمة المساحد ... أهل فضل وأجواد والخير واجد
الكل منهم من هل الدين زاهد ... وآزينهم ان كان للدين رغبات
الاوله قالت: المطاوعه ونعمين ... لا شك دفنوا هل الخير والدين
ولا بقى غير الرجال المساكين ... كلٍّ صلاته بس قدر القريشات
والثانية تقول ما هنا صمايل ... لو آحسايف الدين وباقي الحمايل
لا تردنا للي بهم قول قايل ... يبدي يترهبن والدواسي (١) معباه
قلت امشن يم سوق الخضارة ... حيث أن بها رجال واهل شطاره
اهل المباصط حاضرٍ في نهاره ... وأزينهم وان كان للشي سِكَّات
الاوله قالت: تراهم ذيابه ... أكَّالة بالسوق ماله رقابه
اليا شري الصندوق شفت النهابه ... عطاك ثلاثة ايمان ما شفت فادات
والثانية قالت: تراهم رديين ... لي جا المحرج قال: ترى ما نبي شين
نغز رفيقه قال: حنا شريكين ... والا نزوِّد كان ما فيه شركات
قلت:
توي لقيت اللي يسرون وأجواد ... اللي بحراج الصبح عند الغنم عاد
مختلفة الأجناس من كل مجراد ... دايم حوال الدار ما فيه غيبات
الاوله قالت: ترى فيهم عيوب ... يقول: ما يسون وهو يحكي مقلوب
يشرط سليمه ويجحد اللي به عيوب ... اللي يبيع ويشتري فيه قلبات
الثانية تقول ذولا خساره ... الصدق مدفونٍ براس الزباره
стр. 1268
ما يهتني في راحةٍ في نهاره ... والحلف مطرَّفْ لي حصل زود نيرات
* * *
قلت اجل امشن يوم سوق الحديد ... اللي يبيعون الغيار المفيد
دايم حضور ودايمٍ بالمزيد ... الهقوه انه موافقه ياالكريمات
الاوله تقول ذولا طماميع ... كم جاهل غشوه في مدخل البيع
واللي يغش الناس يبغى المنافيع ... ما ينقرب حوله ولا فيه رغبات
والثانيه تقول انا ما اقبل الجور ... بعضهم إلى جيته والي تقل مصفور
بس يتلهب دايمٍ تقل محرور ... خله بمحله ما نبي منه قربات
* * *
قلت اسمحن لي طاب كيفي وملَّيت ... اجيب لكن رجال لكن عناتيت
ولا ينفع التلزيق لي صار تزنيت ... لكنني ما بي لكن زود فادات
صلاة ربي عد ما هلت امطار ... وعداد ما فلَّتْ من الورد نوار
على النبي وآله وصحبه والأنصار ... اللى صدعوا بالحق ما هي محاباة
قال عبد الله بن علي الجديعي:
عندنا حمام وصار البس يفرس منهن وفي يوم قامت الحرمة ومسكته وضربت به الجدار وفي أول ضربة مات فقلت هذه الأبيات:
البارحه بالليل حجزنا لنا بس ... والظاهر انه من قرادة نصيبه
لي جا القدر عمي البصر لو هو محسّ ... واخر قدم لازم يبي ينتهي به
بسٍ خبيث ضاري لتعسعس ... شره على الديك الحمر يبتدي به
ديك الدجاج اللي عليه يتنومس ... كم مرةٍ لي اذن بدا يهتزيبه
يما نصحته قلت عن دارنا طس ... حمامنا لياك دائم تعثي به
стр. 1269
قامت عليه الام من دون لها حس ... صكت به الحايط على غير ريبه
قام الولد يقول يا يوه اجل بس ... ومن النغاله صار دماغه ربيبه
يما نصحته قبل يطمع ويلهس ... حمامنا لا تقربه وش تبي به؟
من عقب هذا قام يتلوى ويرفس ... وام العيال تقول ما شاف عيبه
من شاف فعله ما يقرب وينفس ... والله ما يقرب محلٍّ وهي به
لو طاع شوري ما عدا او تنجس ... وعزيل من هو للمره هي طليبه
يوم صادته دلا يتلوى ويضرس ... دلت تشيح وتقول ربي حسيبه
انا فزعت وقلت ياشين قم نس ... مالك معه طلبة تسوي حريبه
اخذت للبارود ودي اتنومس ... مير المره سوت امورٍ عجيبه
مسكت المسكين وهو يتلولس ... يبي السلامه مير ما هي قريبه
مالك شفيع عندها لا تهوجس ... ام الصراير كل قربه مصيبه
حنا عياله ما نتكلم ونلخس ... الصادق منا ينتحي عن دريبه
الكل منا للحمام ايتلقس ... يما على الزغلول يرجف قليبه
المقصد ان البس ضاع وتبعبس ... خلا الشجاعه يوم صادت ذبيبه
من أول مبسوط يقمز ويفرس ... ما ياكل إلَّا كل بيضا تريبه
مربع بين الحمام يتنكس ... من شاف منا قام له يهتزي به
ما اخذ حساب اللي بدربه مترس ... ودك تشوفه يوم قامت تليبه
دلى يصيح وفزع الجو بالحس ... ما هنا شفيع لو كلش نجيبه
تم الجواب اللي من القلب يرجس ... والمقصد ان البس تردي نصيبه
وقال الجديعي في التيس، وسماه (تيس جديع)، و (جديع) اسم ابن الشاعر:
امس الضحي نطيت راس الطويله ... صبيت صوتٍ كل من حولي ارتاع
من سمع صوتي من بعيد يجي له ... الكل منهم جان يركض وفزّاع
اللي معه مشعاب يا الله يشيله ... واحد معه بارود واحدٍ بمقلاع
стр. 1270
اجتمعت عليَّ الخلق ما هي قليله ... كل انتخى لي بالشجاعه ومطواع
قلت:
تحزِّموا يا الربع الدعوى طويله ... التيس حق (جديع) يذكر لنا ضاع
كلٍّ ضرب له درب يومي شليله ... يا جود ربعي يوم دشَّوا مع القاع
من عيَّن تيس (جديع) ياها القبيله؟ ... واللي يجيب التيس نملا له الصاع
إمشوا مع الجره وجيبوا دليله ... والحس لا يطلع ترى التيس مهراع
تيسٍ اصيلٍ ما لقينا مثيله ... من جَيِّته ما قط يومٍ وهو جاع
يرضع حليبٍ كل نهاره وليله ... وش لون يضيع التيس وهو توّ رضاع؟
يا ربي العقلان يا أبا الجميلة ... واظن يا أبو علي التيس سَوَّاع (١)
جاني حدى الفزعه عطاه الغليله ... يقول اظن التيس حافنه سباع
يا الربع بعض الناس ما به جميله ... يركض يقول التيس ما يسوى افزاع
(جديع) يصيح دموع عينه هليله ... ويقول: تيسي يا الربع وين ضاع؟
حدثني عبد الله بن علي الجديعي قال:
عندي ولد عمره ما يقارب خمس سنوات، وكان في بعض الأيام يذهب إلى الجيران يلعب مع أولادهم، وفي مرة نتعشى أنا وإياه وكانت أم الولد عندنا فقالت انه طالع اسد يقولون انه ياكل البزارين، وانه اكل ولد بعنيزه وأكل ولد بالوادي، بسم الله على اوليدي لا تروح لم الجيران ياكلك الأسد.
وأنا أعلم أنها تريد تخويف الولد حتى لا يروح للجيران وادري أنها تكذب ما هناك أسد، وبعد يومين من كلامها خرجت لصلاة الفجر والمسجد بعيد عن البيت، وعلى طريق المسجد غرفة للعمال الذين يعملون عندي بالمزرعة، وكان الطريق بعضه منور وبعضه طافية أنواره، وكنت في طريقي إلى المسجد ولم يرعني إلا بالاسد يقابلني مع الشارع فقلت بنفسي: اثر الحرمه صادقه، اثره
стр. 1271
صحيح اهنا اسد وكانت غرفة العمال خلفي فرجعت بسرعة اريد غرفة العمال، وكان بيني وبين الغرفة ماسورة الكهرب وفيها رباط، والوقت ظلام وما كان مني إلا أنني ارتطمت بالماسورة وانقلبت على ظهري، وإذا رباط الأسد قد وصلني، ولكن لم يكن أسد كان ثور ابرق للجيران، ولم يكن كبير، وكان المسكين خايف جدًّا حيث إن الكلاب تطارده بالليل تريد أن تأكله، وحينما وقعت على الأرض إذا هو يجعل فمه على حلقي ولكن أنا عرفت أنه ثور.
فما كان مني إلا أنني مسكت رأسه وقبلته وقلت له: الله يجزاك خير، من شدة الفرح حيث لم يكن أسد، وقمت وحمدت الله على أن العمال لم ينتبهوا ويضحكوا عليّ وعبرت عن هذه القصة بهذه الأبيات:
يا سامعين ابيات قصة خفيه ... خذها افصلها على كل ما صار
البارحه بالليل بعد العشيه ... جاني خبر ان الاسد ياكل اصغار
يوم المره جابت اعلوم زهيه ... تبي الولد لياه يبعد عن الدار
وانا اعرف انه اعلوم رديه ... تبي ولدها ما يضيق على الجار
ذهبت للمسجد والانوا خفيه ... واهل المساجد لجَّوْا الصبح باذكار
الوقت ظلما والكهارب اشويه ... ولا راعني الا بالأسد يوم هو غار
ما اكذب خبر بالحال هجمه قويه ... رديت ابشرد مير حالن الاقدار
ضربني ارباط بالعمد هالسويه ... ردحت بالبيدا ولا عندي اخبار
يوم انه وصل وايلاه ثور بليه ... ومن الفرح حبيت راسه لي امرار
قلت: يا مرحبا بالثور يا رب حيه ... احسبك اسد يا شين خليتن انهار
اخذت قلبي وانت عجل هفيه ... راسك بلاك الكلب يالثور من دار
خبرت ربعي مير ضحكوا عليه ... الثور يروعك وين عقلك والأفكار
والله لو انتم حضرتوا القضيه ... ان يتغير وضعكم يا ها الاخيار
امر دهان بلحظة لي اشويه ... ضاعت المراجل والشجاعة والأقدار
جاني اسد يكفخ ازعومه قويه ... وانهارت اعصابي والمقادير تندار
стр. 1272
والحرمه اللي غشتن بالخطيه ... اتسولف على وقلت حكى المره صار
احسبه اسد مير صارت عفيه ... انقصت على ثور من الخوف منذار
توي اعرف اني اعزومي رديه ... حبيت راس الثور وابديت الأعذار
هذا جرى والنفس ما هي خفيه ... لا تواخذون اللي يعلم بالأسرار
هذي أبيات قلتها والحذيه ... ابي الستر لا ننفضح بين الأشرار
والعمر يفنى والمقادير حيه ... ومن قالب الدنيا يميز ويحتار
كم واحد برتاح بادناة هيه ... قلبي وعقبي من طولين الأشبار
عنتر وهو عنتر يقول لخويه ... من علم الثور الحمر ضرب الأحرار
أنواع التمر:
لعبد الله بن علي الجديعي قصيدة مربوعة في أنواع التمر المعروفة في القصيم وهي نفيسة استقصى فيها أنواع التمور وذكر بعض خصائصها، ويحتاج بعضها إلى شرح وما أجدرها بالدراسة وإفرادها في جزء خاص بها، ونشرها لفائدتها قال:
دوك إياها سكريه ... رقم واحد مية ميه
ماله جنس أو حليه ... بالثلاجه او ضميد
والبرحيه لا تنساها ... وقت البسر ما احلاها
ما هنا غيره في مبداها ... كلٍّ عارفها اكيد
والرقم الثالث بريم ... دورها دائم مديم
والظاهر جنسه عديم ... وزود الحكي ما يفيد
وايضا يا راعي التمرا ... والسكرية الحمرا
دورها لو بالقمرا ... ما له جنس بالوجود
والرقم الخامس ونانه ... تسمى بالأول منانه
اقرب منه لو اذنانه ... هي العد اللي عديد
стр. 1273
تقول قضيت وخلاص ... وهو باقي (الأخلاص)
يوم هو بقياع الجصاص ... يطلع الدبس الجميد
لا تنسي نبيتة علي ... خل الثلاجه تنتلي
وهي اللي تمره شهي ... وقت افطارك والجليد
والرشوديه لك زهاب ... مضمونه عن الخراب
ولا يجيك العتاب ... لي جا شي ما يفيد
وأيضا عندك الروثانه ... لي خرفته في أوانه
ترى خرابه اذنانه ... بادر خرافه تفيد
وبعد هاذولي سباكه ... اهون لضروسه واحباكه
لو انه والله لكاكه ... عند تلقيحه كود تزيد
نبتة القرعا يا راعيها ... له ناس دائم تراعيها
اللي يعرفه يشتريها ... حيث ان هلها اجاويد
وأضف عليها أم كبار ... أكله زين وسعره حار
من طيب أصله القرار ... ييزيك اسمه بالنشيد
سلطانه وقت الخراف ... ساطع بياضه وتشاف
لقيطه دائم انظاف ... انشد عنها لا تحيد
نبتة سلمي حيثه تصيف ... بسره زينات ونظيف
اللي ياكلها ايكيف ... ام البسر اللي نضيد
والفنخا والمكتوميه ... حول بعضهن بالسويه
والفنخا ابرد اشويه ... عند الحمو والتبريد
والشقرا ام القصيم ... سمي عليها الهضيم
شكله شوي وعديم ... ارجع لمه لا تحيد
القطاره والخضريه ... واللاحميه ومكفوزيه
وام الحمام اكويريه ... في وقت ما هو بعيد
عندك عريمه وصقعيه ... واللي تسمى ارزيزيه
стр. 1274
او شبيبي أو عيدية ... و (النحو) اللي فريد
الحلوه وهي امعروفه ... لي صارت توه امخروفه
حيثه معروفه ومالوفه ... والعرينيه بالأكيد
واللي تسمى ارسينيه ... تمره احمر حول النيه
فازت عليه البرحيه ... ما هنا صمايل تسويد
والصبيحية الصبيحيه ... بالمسا او العشيه
ونصحبه ماهي رديه ... واطلب من الله المزيد
وام الخشب ما تخفاك ... خله دايم لك تبراك
يا الله من جودك وعطاك ... لو هي بشعه به تنكيد
وايضا بعد نبتة عيد ... بالثلاجة للتبريد
كثر منها تستفيد ... تصلح خراف وتجميد
والمنيعيه بسيرات ... وقت الخرافه بتات
والكل منا له مشهاة ... التمر كله مفيد
وعندك المنيعة نوعين ... طب وخير بلونين
بسره لذيذ وزين ... ولا ترفع راسك بعيد
عسيله يا راعي عسيله ... لي اكلته مع الدليله
فنجال وتمره يا حليله ... تي تاكل منها وتزيد
وايضا عندك سالميه ... بالثلاجه مية ميه
يا حلوه صفرا عذيه ... ما عندي بَهْ مناقيد
ازعاقه للي مشتاقه ... من يقواها بي الحاقه
من قساها مالك طاقه ... الا اسنون من حديد
عبوده عندي موجوده ... بها الوفا بها الجوده
لا شك في حده محدوده ... توكل رطب ما تزيد
وايضا عندك بيدجانة ... سودا سودا من أوانه
ما هنا هميه من شانه ... من هالدقل العديد
стр. 1275
اللحميه هي مرباع ... ياكلها طير ودفاع
حيثه تبادر بالمطلاع ... هي بالبيت عد عديد
خصيه تصلح خراف ... لا تمادى ما هنا اطراف
كلٍّ يذكر اللي شاف ... والصالح للمستفيد
واللي يسمونه (حوشانه) ... توكل بسر في اوانه
او ضميد في زمانه ... ولا تطول بالتأكيد
وايضا نبتة اثريا ... كان تبيها لو تهيا
وان طلبته هم عيا ... رح لشغلك لا تعيد
وعندك ايضا حسويه ... ماله شكل بالكليه
البسر حلو وشهيه ... من جنس ربعه يالسعيد
وايضا ام الاصابع ... يما ثالث والا رابع
إلى اكلته ما انته شابع ... لي كلت مره ما تعيد
وايضا عندك ام البيض ... اللي يشريها حظيظ
شرحه طويل عريض ... مثل البرحيه تزيد
وهنا اشكالٍ ما جبناها ... مثل السلج عديناها
والحقيه لا تنساها ... تمر خالص ونضيد
وهنا اشكالا كثيره ... تبتة سيف والا غيره
كل اسم جانا من ديره ... كلٍّ يشري ما يريد
جانا اشكال ما نعرفها ... ما يعرفها غير خارفها
تركناها لا نصرفها ... أصقطناها بالتجريد
ترتيبي ما هو عن عرف ... لو بينا كل الصنف
هذا فكري شي طرف ... تسويد ماهو تجويد
هذا ونصلي ونسلم ... على الهادي والمعلم
عدد ما قال المتكلم ... والله الهادي للعبيد
стр. 1276
غزليات الجديعي:
عبد الله بن علي الجديعي شاعر مكثر من الشعر، والغزل فن من فنون الشعر، وباب مهم من أبوابه، وقد رأينا الأدباء في الكتب القديمة يتغزلون من أجل التغزل، لا أنهم قد احبوا امرأة بينها.
وقد صار افتتاح القصائد بالغزل طريقة في الشعر القديم شائعة ولدينا شاهد مهم في قصيدة الصحابي الجليل كعب بن زهير التي أنشدها رسول الله ﷺ في مسجده الشريف.
فخلع الرسول الكريم عليه بردته، مكافأة له على ذلك.
ولذلك لا نستطيع أن نقول: إن غزل (الجديعي) هو حقيقي، أو هو تصوري بمعني خيالي، وإنما نترك ذلك لفكر القارئ أو خياله.
وهذه طائفة من غزلياته:
مرادّ مع فتاة وهي من نوع التسلية:
يا بنت يا للي تلبسين العباةِ ... سوي بنا معروف بالبشت خشين
خلين أشوف الزين باقي حياتي ... تكفين يا بنت النشامى وتبقين
ودي أشوف الزين والمواصفاتِ ... خلين اشم الريح وانت تعرفين
انا عليل القلب وانت اشفاتي ... انت الدوا للي على الجنس مشفين
قالت:
لعاد شايب وش تبي بالبناتِ ... خلك بعيد واترك الزين والشين
ترى الذي مثلك يناظر المماتِ ... وش قدم من الأعمال لي صار بعدين
غض النظر عن باقي المترفات ... واتبع طريق الرشد خل الحواقين
قلت ايه بس الزين عنده فواتي ... اقرا عليك الورد خوفي من العين
انت بهالدنيا وحيدة بتاتِ ... مالك شبيه نذكره، لا تقولين
стр. 1277
قالت:
اضرب ادريبك واترك العابراتِ ... ما نيب لمك لا تغثن وتوذين
شف البيوت املات بالعانساتِ ... دور بني جنسك على الكيف بالزين
قلت:
والله لوهن كلهن مجمَّلاتِ ... فلا يجن مثلك على الزين وافين
انت لحالك درة بالفلاةِ ... ما انتي من اللي زينهن بالفساتين
خوفي من الله واتركي المجادلاتِ ... تحت جنوب البشت تكفين لفين
خلين اشم الريح لو لحظاتِ ... انكس بعمر زين وانت تعبرين
قالت:
خذ النصيحة قبل أوان الفواتِ ... دور بني جنسك من اللي مسنين
الشايب لي شيب فلابه حلاةِ ... الَّا مع اللي بالمساجد مصلين
قلت:
الشيب هذا صابني إغلطاتي ... تراي صغير ما بلغت الثلاثين
حمولتك يا بنت بهم إفزعاتِ ... وانتي الذي من بدهم تي تشحين
طلبتك بالمعروف قبل المماتِ ... حبة هوي تراه يا الترف تيزين
منيب كايد بس لو العقاتِ ... خلين اشم الثوب من تحت الأبطين
وانا احلف أيمان ومغلظاتِ ... أنه يسدن كان ودك وترضين
قالت:
اخاف تطمع أو تسوي سواةِ ... وتنسى العهد لي شفت لون بلونين
ادور المعروف واحصل شماتِ ... اضرب طريقك واترك الحكي باللين
القلب يابس وأللسين طراةِ ... إلعب على غيري وخل الحواقين
قلت: اجل خذي من هذي الوصاةِ ... خايف عليك من العدى كان توحين
الزين ماهو سارح بالفلاةِ ... ما هي خواصٍ بالشوارع تمشين
قالت:
اقصر لطرفك عند لبس العباةِ ... غض النظر من جنس ناس مغضين
لا تناظر الماشين والمترفاتِ ... يلعب عليك إبليس من دون تثمين
стр. 1278
قلت: هذا كلام قبل لبس العباةِ ... بلاك ما تدرين وش بك تغبين
أنا عزيز النفس ما بي رداةِ ... واعلمك بالصدق حتى تعرفين
واجد الجهام ولا يحرك شهواتي ... لا شك مثلك يالحبيبه يخلين
انتي اخذت الزين عن البناتِ ... من شاف زولك قال: ما فذ به شين
قالت: اجل اصبر عليّ اسنواتِ ... خل استخير وصافي العلم بعدين
خلن اشاور والدي مع خواتي ... واشاور اللي بالمعرفه مديمين
واقول هذا شايب به جراةِ ... لي قابلن بالسوق يقول: حبين
مع الكبر والشيب ايضًا دناةِ ... قليل الحيا ما ميز الشين والزين
قلت: اصبري عندي شهود ثقاةِ ... انه معي عقلي كلٍّ يزكين
يومي لمحتك صار عندي خلفاتِ ... انتي الذي يوم شفت جرمك سبعتين
واتلى ألتلاوي صار حظي شماتِ ... هذا اللي انا حصلت قمتي تعذلين
عطين عقلي راح عندك فوات ... خلين اشوف الدرب مع المسلمين
تراني ما حللك عقب السواةِ ... قعدت وسط السوق كني مجينين
قالت:
لي راح عقلك فانت بالموروراتِ ... خلك بعيد لا تشوف المزايين
لا تقرب الزينات والمعرباتِ ... دور على شكلك من اللي مسنين
قلت العفو يا متابع الطاغياتِ ... زينك هو اللي يودعك به تمارين
قالت:
يالشايب الملقوف ما بك حلاةِ ... خل الهزل واسلك دروب العزيزين
قلت:
الشيب ما هو عيب مير أنت عاتي ... لو تنعشن ما شفت للشيب تلوين
لي صرت ما ترحم ولابك جداةِ ... خل انتجع البارق مع اللي مفلسين
قالت:
امسك طريقك واترك الغافلاتِ ... عليك بالمقبل وخل المققّين
أنا وجنسي ما لنا بك شهواتِ ... عذر العقل اللي يعضض بالايدين
стр. 1279
وقال الجديعي هذه الأبيات مرادّ مع فتاة وهي من الشعر القديم، قال: أرسلت لي هذه الأبيات بنت وأنا لا أعرفها أبدًا، وبعد مدة أرسلت لها هذه الأبيات مع الذي جاب لي الأبيات منها هي تقول:
يا طيور ياللي بالسماء مستديره ... وين اللي ياخذ الأجار والسر مكتوم
يودي جوابي مهجةٍ لي بديره ... ويجيب لي عن صاحبي خبر وعلوم
حالي قضت والروح مني خطيره ... من يوم سمعت انه مكوي ومحجوم
والله يالولا قصرتي والمعيره ... خوف من الأشرار يجي زود مثلوم
لامشي على رجلي واشاهد نظيره ... واشوف زوله مانبي خبر ووهوم
مير المره فشله ورجله قصيره ... وهذا من الباري مقدر ومقسوم
* * *
يابو جديع الله علم بالسريره ... حبك تجدد على كل مرسوم
كلٍّ إلى جالليل تسمع شخيره ... وأنا على حيلي ولا جاني النوم
متى تجي مع سوقنا بالصغيره ... تقضي لزوم اللي حريص وملزوم
يا أبو جديع انته بعقلي خشيره ... اهزع علي عندي جوابات وعلوم
والله ولا بي شين ولاني ضريره ... وادور علي اللي بسبتي فزَّع الحوم
واعرف ترى الدنيا اخطاره كثيره ... كلٍّ ينام وصاحبي ما يبي النوم
قال: فرديت عليها بهذه الأبيات:
يا راكب من فوق ددسن صغيره ... مردوفة مع مثلها من كثر ما يحوم
ماجت من المصنع تمشَّى حفيره ... ولا عاقها لو حاتها أو زود رسوم
سواقها بالليل صاحي نظيره ... يقضي لزوم اللي حريص وملزوم
يا سايق الددسن عسى فيه خيره ... عيني تهل الدمع بالخد مرشوم
стр. 1280
واحفظ لسدى لا تبيح السريره ... وصفك جميل ما يبي زود معلوم
اللي علي شاني عيونه سهيره ... اليا صفا جوه عن الكدر وغيوم
اسلم وسلم عد وبل المطيره ... مردوفة من مثلها ما بها ثلوم
يا درة تذكر بوسط الجزيره ... أتعبت الدوار من كثر ما يحوم
انا اتمنى شوفته لو مريره ... قلبي تعلق به ولانيب مليوم
وبعد مدة أرسلت لي هذه الأبيات:
لي صاحب من البطا حول ابنساه ... ذالي ثلاث اشهر عزِّيل حالي
امس الضحى مريت بالسوق والاه ... يسلم علي الدلال واقف اقبالي
وقفت لين انه تعدي واويلاه ... ليته وقف لو ساعة بالظلال
كم ليلة بته وانا اقول: يا الله ... يا فارج الشدادت يا ذا الجلال
انك تلين اقليب خلي علي ارضاه ... وانك تعطفه لي وترحم لحالي
يروغ قلبي كل ما حل طرياه ... عليك يا راع الوفا بالكمال
يا أبو جديع كيف ما قلت ننصاه ... يبرد علي كبدي لهيب وصالي
ذالي ثمان اسنين وانا اتمناه ... اللي اخذ قلبي بليا جدال
الراس شيب من كثر ما بكيناه ... وقضت دموع العين مما حدى لي
كلٍّ تهنا في منامه ولا جاه ... عبرات بالصدر ما بقاله توالي
مكتوبي اللي جاك كودك تملاه ... يشرح لك الموضوع يا ابا الجمال
وبعد ما وصلتني هذه القصيدة رديت عليها بهذه الأبيات وأنا لم أعرفها ولم يحصل لي الاتصال المباشر عليها حتى اعرف الموضوع فقلت:
اهلا وسهلًا يا حبيب عرفناه ... اعداد ما تسفح ارفوف الخيالِ
ساعة لقيت الظرف قمت اتملاه ... وعرفت مضمونه بليا جدالِ
يا مرحبا به عد ما حل طرياه ... واعداد ما هبت هبوب الشمالِ
كم دمعة فوق الوساده نثرناه ... نبكي علي اللي وافي بالجمالِ
стр. 1281
يا ابا الوفا جتني مكاتيب واقراه ... ذالي ثلاث اسنين مقر بخمالي
الشعر من شانك كتبته وقلناه ... والا قبل ما يلتفي لي ببالي
يا ام العيون السود والخد حلياه ... نورٍ سطع من عاليات الجبالِ
جرمك جميل تو حِنَّا عرفناه ... متميز بالزين وافي الكمالِ
اهلا وسهلا عد وبل نثر ماه ... واعداد ما تلعج بروق اتلالي
مطلوبك ابشر به وامانه تمناه ... ابشية المعبود ماله محالِ
وهذه الأبيات هي أول ما وصلني منها وكنت أجلب علف علي مدينة حائل ووجدت هذه القصيدة في غمارة السيارة وابهرني حيث أني لم أدر من وضعها في السيارة وقبل صابني وجع في رجلي وانقطعت عن السوق لي مدة شهرين حسب ما قالت بالقصيدة تقول:
شفي طويل يجلب القت مصرور ... علي سوق حائل يوم ربي عطاها
ياللي اخذت نومي وانا عنك مقهور ... قهرت محابيس كثير رداها
جاني خبر عن وجع رجلك وماجور ... حبك سبا حالي وجدد عناها
اشوف حالك كل يوم بحادور ... عيون حسادك علينا غثاها
ابطيت عنا يا بعد كل مذكور ... حالك قضت لعل نفسي فداها
يا شيب عين اللي مخصور ومكبور ... يتيمة منوا عليها بعشاها
ودي أشوفك لو اسويعه ومشكور ... يبرد على كبدي لهيب غشاها
انته بعيد عن وانا دوني قصور ... مكسورة الخاطر تجدد بلاها
هذا جوابي وخاطري بس مكسور ... عبرة تجي وعبرة من وراها
اسلم وسلم عد ما شعشع النور ... اعذر جواب اللي كثير بكاها
ورديت عليها بهذه القصيدة ولكن أنا محتار حيث أني لم أعرفها ولم أدر من كيف المخرج فقلت:
стр. 1282
يوم الثلاثا وافق القلب بسرور ... مكتوب لقيته بالغماره زهاها
اهلا عدد ما حرك الريح مطرور ... واعداد نبات علها من سماها
واعداد خلق الله من ادم الي الصور ... وعد الجراد اللي نشر من وطاها
جاني جوابك يا حلا كل منظور ... يا شمعة البلور ما احلى ضواها
فرحت به فرحة من ظهر وهو مقهور ... والا وجيع العين جاها ادواها
يا للي كما نور القمر وانت بك نور ... زود على نوره، ورجلي فداها
لذة جوابك حين ما جات مصطور ... برَّد وجع رجلي وروحي نعاها
انتي بها الدنيا كما وصف بللور ... فقتي علي الزينات الي منتهاها
يا ريحة العنبر على ورد وزهور ... يا نجمة بالصبح نوره غشاها
لعل همك ينجلي عنك بسرور ... آمين عسى نفسك تحصّل مناها
لعل من هانك يجي عقله اقصور ... لعل عينه ينتزح عنه ماها
انتي بها الدنيا كما الدر منثور ... واحلا من العنبر على مستواها
انتي طري وانتي حلا كل مذكور ... يا لذة الدنيا على من بغاها
يامنوة العشاق يا حسنة الصور ... يا بكرة الرحمن ما احلى بناها
يا غيمة هلت مطرها بشختور ... على النفود اللي بعيد ثراها
تشكين عليّ الحال يا شمعة النور ... كلبها الدنيا يقلب غثاها
انا صبرت اسنين وانت اصبر شهور ... لا بد ما تاصل الي منتهاها
لو الجدا نفسي انا كان مخطور ... نفسي فدى لنفس من هو فداها
ويفداه غيري من لبس دلع وخصور ... ويفداه ابين بالجمايل تراها
ويفداه من حط المناظر ومسرور ... على حياته يتبع اللي وراها
ويفداه من حط المخامير وعطور ... تومي بزينه توري اللي وراها
ويفداه من قاد المراكب بطابور ... يم البحور اللي كثير شقاها
ياما عيوني يا بعد كل مصفور ... يا نافلة بالزين كل اقصراها
انتي سبب اشفاي يا طلعة النور ... يا غيمة بالصبح يبرق سماها
ساعة قريت الخط وانا منك مسرور ... ربي كريم يوم رجلي شفاها
стр. 1283
صرتي سبب دواي عن كل دكتور ... واللي نثر من دمها اوكواها
ساعة قريت الخط ما شفت عاثور ... برد وجع رجلي وسبب اعفاها
مشكور يا حلو النبا ألف مشكور ... يالذة الدنيا ولذة حلاها
لذة جوابك لدة الخد ممطور ... ذاله ثمان اسنين ما ارعد سماها
برد على كبدي لهاهيب وحرور ... حر على كبدي، ونفسي شواها
هذا جوابي وانت بالزين مذكور ... واللي يحوش الزين والا بلاها
اعذر كلامي وانت يا الترف معذور ... ومن لا تعذر لا يفرح نماها
كانك يتيم فانت صالح ومبرور ... ولا عمر بنت فرحوها اقرباها
كل الخلايق اتفارق الدار لقبور ... لو طال عمر النفس جاها وفاها
صلاة ربي عد ما رفرف النور ... على نبي نازل اسمه بطه
وحيث إن بعض العجائز حالت بيني وبينها عن الزواج قلت هذه الأبيات:
يا طارش من فوق ما يقطع البيد ... اهزع علي اعطيك مني علامي
وده لعجز جالسات ملابيد ... هرج انتفا من بينهم يا سلام
ولِّي عجوز راسها تقل عربيد ... معها ابليس يدرسه بالتمام
قلبه حجر والا من النار ما يبيد ... عيت تلين ولا نفع به كلامي
وأيضًا قلت في هذه العجوز التي حالت بيننا وهي جدة البنت المذكورة:
البارحه دمعي على الخد منثور ... باسباب من حالت على اللي محبين
ولي عجوز كان ما فيك ميسور ... ولابك من الشيمات ما يمسح العين
قلبك من الاحقاد يشبه التنور ... مبلية بالمكر والكذب والشين
ما بك من المروه ولا وزن عصفور ... او لك مقاصد مير ما انيي تسرين
ماجور ياللي تصلح الحال ماجور ... عطنا خبر ترى الجماعة مودين
стр. 1284
وقلت أيضًا بالتي حالت بيننا:
لعل شحص حال بيني وبينه ... لعل ربي تالي العمر يعيمه
لعله ما يربح ولا الله يعينه ... اللي تسبب بين غالي وغاليه
عساك بالدنيا دوام حزينه ... ما جاك نقص مير غل تصاليه
بعض العجايز دائم في وهينه ... ما هي تخاف الله ولاهيب ترجيه
معها لسان يلتوي كالعجينه ... الزين يطلع والحقد به تخفيه
* * *
وخلاف ذا ياللي علومك ثمينه ... اهزع علي اعطيك علم اتوديه
سلم على المحبوب والله يعينه ... يصبر على البلوي وربه يعافيه
حنا الفرج من ربنا مرتجينه ... يفرج هموم اللي همومه اتوازيه
بعض العجايز لا تحسبه ذهينه ... إبليس معها بالفراسه تقريه
تجي لباب الدين وهي لعينه ... قليبها في كل فن تلويه
وقال أيضًا:
يا للي تجاوبني بنظمك للاشعار ... اصبر لعل النفس تحصل مناها
يا طير يا اللي بالجناحين كد طار ... سلم على المحبوب وخفف عناها
البارحة بالحلم وافان زوار ... واصبحت من ليلي بغاية حلاها
اهلا وسهلا عد ماهلت الامطار ... على حبيب العين وغاية غلاها
ولِّي عجوز حطت الهم واكدار ... على قلوبٍ صافيات تراها
ياالله ياللي عالم كل الأسرار ... انك اتفارق به وتقلع مداها
نحط عيد لو اتفارق عن الدار ... هذي وجنسه ما نبيه وبقاها
حطت عذاريب صغيرات واكبار ... ماله مقاصد مير إبليس وراها
يا الله عسى روحه لقصاف الأعمار ... حتى يزين الوقت ونصبر بلاها
وين انت ياللي تودي الخط باجار ... وصِّل جوابي واحذر انك تفاها
سلم على المحبوب وقل له إلى صار ... يوم الخميس وبشية الله لقاها
اسبر وانا قلبي على صالي النار ... وعين من الفرقا قضا زود ماها
стр. 1285
صبر المحب اللي على القلب لو جار ... عيا يفارقني وعيا ايتناها
وهذه أبيات تهيض:
امس الضحى من عند زول تمثنيت ... اثره سبعني يوم شفت الجدايل
والله ما جيته ولاله تعنيت ... ولاني حريص مير شي هوايل
يابو عيون سود وش بك تبليت ... مسكين ما وده تطول المسايل؟
يا ليتني مارحت يمه ولا جيت ... سوق نزل به صافي الخدّ نايل
الله لا يبلان حي ولا ميت ... كيفه اخذ عقلي وخلان عايل
ماني ردي نفس ولا عمري اشفيت ... بتله اصد اليا لحظت الحلايل
مير المقدر لي جرى ما نفع ليت ... ولا ينفع المجروح مثلي دلايل
يا أبو ثليل فوق متنه علاميت ... خف بي من الله لا تزيدن غلايل
لي اوحيت صوتي لاتبيَّن من البيت ... تجدد جروح دارسات حوايل
اخذت قلبي يا اريش العين وادعيت ... دموعي علي الخدين يمشن سوايل
كم ليلة ترقد وانا ما تهنيت ... اخذت نومي يا ظبَيّ المسايل
اليا هجعت وقلت هالحين غطيت ... ذكرت مجدول على المتن مايل
كم مرة بالليل ذكرته وفزيت ... واصبحت على حيلي كثير الملايل
انا مريض لو كويت وتداويت ... ودواي عندك يا كثير الجمايل
اليا ذكرت خدود ونهود ونيت ... ونة جريح فوقه الدم سايل
عز الله اني لي وصفتك تدانيت ... الله عطاك الزين واصبحت نايل
لي شفت طولك قلت عشت وتهنيت ... وان شفت عرضك قلت وافي الخصايل
ليتي بجنبك لي رقدت تغطيت ... حتى اتهنا دون رد الفعايل
ما ينفعن كثر البكا لو تمنيت ... كلٍّ تمنَّى مير ماهوب نايل
من شوفتي لك ما عرفت الوي البيت ... امسي على الهاجوس مالي دلايل
стр. 1286
مراثي الجديعي:
عبد الله بن علي الجديعي شاعر مكثر طرق فنونًا عديدة من فنون الشعر وأبوابه، له نفس طويل، وتعبيرات عفوية رائقة.
ولم يشذ عن ذلك (باب المراثي) عنده.
فكان أن رثي زوجته (لولوة بنت عبد الرحمن الفعيم) بمرثيتين إحداهما سماها المرثية الأولى وهي بائية والثانية عنوانها: (مرثية أم العيال الثانية) وها هما قال:
هذه مرثية أم العيال لولوة بنت عبد الرحمن الفعيم، كان ابني جديع يبكي فقلت:
جديع لا تبكي على امك وتنعاه ... ما بك من الليعه ولا عشر ما بي
يا جديع هذا الحق لو ما بغيناه ... والله جعل للصابرين الثوابِ
لو البكا ياجديع ينفع بكيناه ... يما بكيت أمي ولا عاد ثابِ
كم من عزيز يا وليدي دفناه ... واللي نهج لي راح ماهو يجابِ
راحت وحنا يا حلالي فقدناه ... والظاهر انه ما يجبر مصابي
لي اجتمعن الزينات عندي ذكرناه ... تبين الخافي وبان الصوابِ
لصاحت وحده قامت اخته ترجاه ... لي تضيعين اللي مضى والثوابِ
وانا الضحية بينهن لو كتمناه ... ما هي رخيصة مير مالي مجابي
دمعي على الخدين لي حل طرياه ... ابكي ولا واحد أظنه دري بي
العشرة اللي بيننا ما أبنساه ... خمسين عام روحت بالشبابِ
والله من يوم مضى وتمناه ... يوم الزمان الزين مع الرحابي
لي ضامتن سود الليالي نصيناه ... اهيض عليها ما لجا بالجنابِ
الدار من عقبه ترانا جنيناه ... أليا دخلته أوجس القلب ذاب
الدار ماله ذنب لا شك ما ابغاه ... عقب ام صالح عدها للخراب
لي جيتها يفز قلبي لذكره ... مالي بها حجة تجدد صوابي
стр. 1287
ارجي من الله جنة الخلد مثواه ... في رحمة الله ما يمسه عذابِ
عسى أم صالح في نعيم تلقاه ... في جنة المولى عزيز الجنابِ
جاها من الأمراض شي رايناه ... خمسة عشر عام وهي باكترابِ
حقه علينا واجب ما نسيناه ... لا والذي ينشي مزون السحابِ
الكل منا يذكره ويتمناه ... مير الليالي فرقت للحبابي
لو كل محبوب بقى ما فقدناه ... كان أم صالح ما تعدا الحساب
الموت حق ولازم الحق نرضاه ... هذا من المولى عزيز الجنابِ
صلاة ربي عد ما حل طرياه ... على النبي اعداد ممطر سحابِ
مرثية أم العيال الثانية:
الله يثيب اللي نصونا معزين ... على ام صالح جعلهم للغناةِ
كثر ألعزا زوّد مصابي مصابين ... على ام صالح ما تفيد العزاةِ
الياذكرته هل دمعي صليبين ... واكبر مصيبه لي حضرن البناتِ
وان قلت لاكبرهن: وشوله اتبكين ... كفِّي ادموعك لا يجن مكبراتِ
تصبري والله مع اللي مصابين ... واللي صبر يزاد له بحسناتِ
قالت تلومن والمصايب تبارين ... لي زلت الأولى والى ذيك تأتي
والله ما الومه ولاهوب خافين ... مير المصائب خيلها مسرجاتِ
الموت لابده وبالحق راضين ... مير امنا جتها المنية فجاةِ
الياذكرت أوصاتها اللي توصين ... تقول لا تنسان بعد المماتِ
والقبر بخضيرا مع اختي والابنين ... ودِّي اصير بجنبهم يا شفاتي
وجديع لا تنساه وبره مغطين ... شف له من الزينات ظبي فتاةِ
وايضا بعد شفني اوصيك هلحين ... بناتي اللي كلهن محسناتِ
وايضا محمد هو وصالح حبيبين ... ما قصروا بأفعالهم الطايلاتِ
стр. 1288
حب العيال اللي عن النوم ملهين ... دايم على بالي وانا بالصلاةِ
وضحيّةٍ تذبح وتعطى للادنين ... واجتمعوا على التقوى وحسن الصلاتِ
قلت ابشري باللي تبين وتريدين ... عيالك كبار وكلهم في غناةِ
وابشرك بالخير وانتي تعرفين ... أن المرض لي طال فيه احسناتِ
قعدت عنده يوم قامت تحاكين ... جابت علوم من سنين مضاتي
طلعت من عنده ونفسي تشاكين ... ماهيب عاده تذكر الفايتاتي
اتلى كلامه قولته لا تخلين ... وتحللن عما مضى بسنواتي
عساك مني يا ام صالح بحلين ... حلن افراش لك وحلن غطاةِ
يا الله عسى قبرك رياض ورياحين ... وعسى موازين السعد راجحاتِ
كانك رضيتي فأننا عنك راضين ... الله يبيحك من جميع الجهاتِ
دار الفنا مابها لذاذة وتمكين ... كله نكد ومفارقٍ للحياةِ
كم فرقت من بين ناس عزيزين ... اسقتهم الامرار والمنغصاتِ
عسى أمّنا من عقب داره بعليين ... عساها بالجنة بكل الهناةِ
من عقبها ما ظن حنا بسالين ... بان الغلا من عقب وقت العزاةِ
الله يسامحها عن الشين والزين ... ويجعل مقره في نعيم وهناةِ
صلاة ربي عد ما ترمش العين ... على نبيٍّ فاز بالمعجزاتِ
أرجوزة الأسرة:
من تجديدات الشاعر عبد الله بن علي بن محمد الجديعي أنه أنشأ أرجوزة مربوعة من الشعر العامي في أسرته (أسرة الجديعي) ذكر فيها أول من جاء منهم إلى منطقة بريدة ثم تدرج إلى ذكر أسماء جميع الأشخاص منهم في نظم سهل.
ولم أر من فعل مثل فعله في منطقتنا، وربما أيضًا في غيرها.
وقد يسأل سائل عن كونه نظم أرجوزته هذه باللغة العامية وليس بالفصحى؟
стр. 1289
والجواب أن الرجل نفسه نشأ أميًّا لا يقرأ ولا يكتب، ولكنه عَلَّم نفسه بنفسه حتى صار عضوًا في هيئة الأمر بالمعروف والنهي عن المنكر في بريدة، ثم صار رئيس مركز من مراكز الهيئة - وهو الآن عام ١٤٢٧ هـ مؤذن وإمام مسجد في محلته محلة خضيرا من بريدة.
وهذا أول الأرجوزة:
باسم الهادي دوك إياها ... بأسرة (الجديعي) نبداها
بالمودة ما أحلاها ... نلحق أولها باتلاها
ودي أعلّم قاريها ... يفهمها في معانيها
قبل التعليق بمنشيها ... مع العذر يوجد فيها
اسمع مني ها الأرجوزة ... في صدري كانت محجوزة
أعطيك إياها منجوزة ... في آل جديعي محيوزة
أهلًا وسهلًا بالأديب ... خذ الواقع والمصيب
عن أبياتٍ في القريب ... بآل جديعي بالترتيب
خذها مني وأعتذر ... عن تقصيري بالأمر
تفضاة ما جا بالصدر ... تبويب ما جا بالأسَر
أبي اعبر عن جدودي ... قدر عرفي ومجهودي
من فيض حبي مع اسعودي ... لي جبت أهلي بالمنشود
واللي عندي ابي اقوله ... إلّا إن قال أحد: وشوله؟
أعطيه اعلوم مقبوله ... عز وشرف بالحموله
واللي وده بالدليل ... يمشي معي لو قليل
ما ودي أزود وأطيل ... عن المقصد يا الأصيل
لا تجيب الحاصل أو تذمر ... الأصل يا خي من شمر
هم الطنايا والأمَّر ... لا تحسب قولي امقمر
أعطيك من عندي أسماهم ... أولهم حتى يا اتلاهم
стр. 1290
من فرط حبي وغلاهم ... من بغاهم دوك إياهم
والله الله إني أغليهم ... من أولهم إلى تاليهم
هذا وربي حاليهم ... من فضل الله وهاديهم
جديع الأول الذي قدم من مدينة حائل إلى بلدة النبقية بالقصيم:
انتبه خلك فهيم ... من دون قول أو تعليم
اول من جا للقصيم ... حسب ما قال القديم
هو اجديع أبا الصمايل ... جا للنبقية من حائل
حسب ما قاله القائل ... لا تحسب إن قولي عائل
نزل بلدة النبقية ... له اسنيات اشويه
خمس وخمس قدر النية ... ما هو علم ميه ميه
هذا هو الجد اجديع ... خلك فاهم لا تضيع
لأن الموجز سريع ... ما به مجال وسيع
أخذ حرمة من الرومي ... بنت رجال كله قروم
هذا الصحيح المفهوم ... ماهيب اعلوم ووهوم
عقب ما قاموا سنين ... مضّوهن وهم اثنين
رزقهم ربي جنين ... فرحوا به عقب الضنين
عبد الله الجديع الذي انتقل من بلدة التبقية إلى وهطان ضاحية في مدينة بريدة:
اختاروا اسمه عبد الله ... اسم وافي في محله
يمكن جده سمي له ... الله هو اللي يدله
مات ابيّه وهو اصغير ... ما بدا يدورج ويطيّر
قعد عند امه انوير ... أكرم بها أم الخير
يوم بلغ عشر تقريب ... راح يدور المعازيب
مع اليتم اتغريب ... أبو عشر وش يجيب؟
стр. 1291
عمل بالجازه لا غير ... عند عمانه ينطر الطير
لا تقول هذا ما يصير ... فقر ويتم ومصاخير
بعد سنتين لتغريبه ... عطوه ثلثٍ معازيبه
زهيد وش يسوي به؟ ... لو يحصّل شي يجيبه
يوم إنه أخذله مده ... شرى ثور من البده
رجع لامه وصلّح عده ... يبي الزراعة والكده
حط ازريع قد الحال ... فقر ويتم وغربال
صارت ادهور وامحال ... والزرعة صارت وبال
يوم استوى في متمه ... فرح به هو ويّا امه
يبي يحصده ويلمه ... هذا اتعيبه وأكبر همه
يبي يبدا بالحصاد ... جاه البرد والجراد
لما غداله رماد ... ما بقى شيء وكاد
وصى أمه على اتحصيده ... مسكين وش يطلع بيده
عقب هذا راح لبريده ... ما بقي شي يفيده
يوم إنه زان المجال ... عقب الغنا والوبال
شرى بارود وخيال ... صار قيدوم للرجال
أمه ماتت بعد اسنين ... ما بلغ عمره عشرين
ماله قرابه من اين ... إلا الله هو العوين
شرى ملك بوهطان ... وأخذ بنت من الفوزان
من عتيبه الشجعان ... نعم القربة والإخوان
غرس له جمع انخيلات ... يبي العبر بالحياة
شاف الغثا باللي فات ... ودّه يهنا بالراحات
يوم الله أتم الحال ... جاله ثلاثة اعيال
صاروا شجعان ورجال ... ما تلقى فيهم مدخال
стр. 1292
جديع العبد الله الجديع الأول:
أكبر اعياله اجديع ... العبد الصالح المطيع
يوم اقبل نفعه سريع ... عند الله البر ما يضيع
قال لابوه أبي غفران ... ودّي بالحج علي شان
يكفر اذنوبي والعصيان ... ودّي يرافقني فوزان
أنا شايف الممات ... ما عندي طاري رجعات
وإن جا ولد بالحياة ... سمّوه علي يالثقات
راح لمكة ولا جا ... هذا والله الوفا
انتبه هذا الزكا ... هذا العمر وانتهى
يوم قاموا عدة أيام ... جاب الله وليدٍ تمام
سمَّوه علي الضرغام ... طلع شجاع ما يهام
ثم مضى عبد الله الجديعي على هذا النسق يذكر أفراد أسرته واحدًا واحدًا ويعرف بهم وبالأشياء التي أثرت في حيواتهم وهي كلها طريفة ومفيدة، رأيت الاقتصار منها على ما ذكرته منعًا للتطويل.
ومن تجديدات عبد الله بن علي الجديعي أيضًا هذا الحوار الشعري باللغة العامية بين ابن ووالديه مما يصح أن يسلك لو حُسَّنَ وطور في سلك المسرحيات الشعرية أو المحاورات الشعرية الفنية.
قال:
قالت الأم تناجي ابنها حين ما تأخر في رجوعه إلى البيت:
يا قرتي يا مهجتي يا غناتي ... أسهرتني في جيتك لي تأخرت
دموعي على الخدين متسابقاتِ ... وش فادتك يا عزوتي لي تكدرت
فقال الولد:
قال إيه ما تدرين عندي فواتِ ... عند الرفاقه ما نفع لو تعذرت
стр. 1293
نلعب ورق وانتابع المسلسلاتِ ... والا جوائز لو نحصِّل على كرت
فقال الوالد:
يا وليدي فكن ما نبي جائزاتِ ... جوايزي لي صرت عندي وبكَّرت
واكبر مصيبة لي تركت الصلاةِ ... هذي الخساره لي جلست وتفكرت
فقال الولد:
ترى اعيال الناس في هالسواةِ ... ماني لحالي لا تحسبن تعكرت
انته تحسبك في سنين مضاتِ ... ما فارق المنزل وتزعل إلى رحت
فقالت الوالدة:
يا وليدي لو شفتن اوايق على الباب ... ليلي قضى ما ذقت لذة منامي
واليا سمعت اسعاف دشن الأرهاب ... ارفع ايديني ثم اعضض ابهامي
فقال الابن:
مع شلتي والله ولا احسب احساب ... متسلي مع شلتي بالتمامِ
ليلي قضى وانا امازح بالأحباب ... ولا انت على بالي ولا باهتمامي
فقال الوالد:
يا وليد خل المزح لا تصير لعاب ... وكثر السهر يرث عليك الوهامِ
القلب لامك بين الأضلاع مرتاب ... كل ما كبرت اشوي زاد الغرامِ
فقال الابن:
يا بوي لا تكثر عليَّه بالأطلاب ... مانيب لمك لا تزيد الكلامِ
ابي الحق الشلة مع الكيف لي طاب ... واللي هم الصحبه وجل اهتمامي
فقالت الوالدة:
يا عبرتي يا مهجتي يا حلالي ... خل اتهنى بك بتالي حياتي
حتى يهون اللي على القلب صالي ... حر على قلبي ابحبك بتاتِ
فقال الابن:
يا بوه انا لازم اتابع مجالي ... ليالي السهرات عَلْيَهْ فواتِ
стр. 1294
كد قلت لك مانيب انا اسهر الحالي ... عيال الحمايل كلهم هالسواةِ
فقال الوالد:
يا وليدي خلك من دروب الهبالِ ... خذ النصيحة وانتبه للوصاةِ
لا بد ما تفجاك سود الليالي ... همن تشوف افعالك الماضياتِ
فقال الابن:
يا والدي خلن بدربي وفالي ... ما بي لكم زوجه ولابي غناةِ
انا طموح الراي ولا جا ابالي ... اهروجكم واشواركم ضايعاتِ
فقالت الوالدة:
يا وليدي خلن اتهنا ابتاليك ... يما سهرت الليل في اول اصباك
اسهر طويل الليل، وانا لك أواليك ... كم مرت بالليل أواسي لك اغطاك
فقال الابن:
هذا زمان ضايع مع اهاليك ... ماله لزوم تذكرينه اليا جاك
حنا انتابع راينا والمساليك ... مانيب لمك لا تعدين برضاك
فقال الوالد:
يا وليدي خل العنف وخلن أقريك ... دام النصيحة تنفعك ما تعداك
خلك بشوفتنا وعدل مماشيك ... واترك ربوع ما تدلك بمسراك
فقال الابن:
يا والدي ما انيب لمك ولا ابيك ... تنيسني لا صير همك وبلواك
انا مع الشلة ولاني مناحيك ... واترك كثير القول واقنع بماجاك
فقالت الوالدة:
يا وليدي خلك دائم لي مطيع ... اليا ومرتك لا تعيي عليّه
عسي تعبنا ما يروح ويضيع ... نرجي من اللي ما يخيب دعيّه
فقال الابن:
حطوا لكم سواق كوري وشيعي ... شوفوا كثير الناس سووا كذيّه
стр. 1295
يحوش الأغراض عجلٍ سريعِ ... وانا مع الشلة ولا انوي بجَيه
فقال الوالد:
هذا كلامك يا وليدي فظيع ... علومك الزينات صارت رديه
خليتنا بين البراري وديع ... الله يعطف أي لين ترجع عليه
فقال الولد:
يا والدي الشلة حياتي وربيعي ... قلبي اللي ابطيت ركب اردعيه
انا على دربي ولاني مطيع ... تراي مبسوط ولا لي هويه
فقالت الوالدة:
حبيب قلبي حان وقت الزواج ... عمرك تمثنى وانت تتابع ربوعك
وانا قليبي يصطفق كالمواج ... ودي تزوج قبل يمضي اسبوعك
فقال الابن:
انت كلامك صار مثل الحراجِ ... ما انيب لمك مير كفي ادموعك
والعرس انا ما ابيه ولابه خراجي ... ليلي سهر والصبح نوم يتوعك
فقال الوالد:
يا ولدي لا تسوي علينا إحراج ... خلك حبيب ولا تغرك طبوعك
قلبي إلى جا الليل ولع اسراجي ... خوفي عليك من الليالي تروعك
فقال الابن:
يا والدي مانيب ادور اعلاجِ ... قلبي مع الشلة ولابي اسنوعك
ليل السهر هو لذتي وابتهاجي ... واليا بغيت تقوم قدم جمُوعك
فقالت الوالدة:
اذكر افعول في ليالي البرادِ ... وانته اصغير دائم في احضيني
يوم ان سعابيلك ابريقي زبادي ... يوم انت اتطرش قلت لك يا جنيني
فقال الولد:
انتي عليّه دائم بالنكادِ ... ما اغير الياجيتك حنين ورنين
стр. 1296
دائم تجيبين السنين البعادِ ... تناسي الفايت وحفر الدفين
فقال الوالد:
يا وليدي لا تنسى افعالٍ وكادِ ... نبي العوض من راحم المذنبين
اليا كبرت وصار عندك عنادِ ... وحنا نبي نفعك مع المسلمين
فقال الولد:
ما ينفع الترديد وكثر الدوادي ... اترك سبيلي خل امضي سنيني
انا علي رايي وغاية مرادي ... ما ناب لم اقوالكم لا تجيني
فقالت الوالدة:
خلك إسميح والتفت للكلامِ ... يومك كبرت وصار رايك سدادِ
ما انتب سفيه ما تعرف الملامِ ... يا وليدي خلك فاهم للمرادِ
فقال الابن:
كلامك عندي مثل طيف المنامِ ... واكثر كلامك زودن بالنكادِ
قلبي مع الشلة وغاية مرامي ... بس انجزي عطين عدٍّ اعدادِ
فقال الوالد:
من أول نرجيك مثل الحلامِ ... مثل الذي ربَّى طيور الهدادِ
واليوم عمرك فوق عشرين عامِ ... طفرتنا من كثر زود العنادِ
فقال الابن:
انا ابي لي سيارة بالتمامِ ... ودي افحط دام عندي جلادِ
هذا الطلب يا بوي مع السلامِ ... وزود الحكي ما له لزوم وكادِ
فقالت الوالدة:
وش لون تي اتفحط وعمرك ثلاثين ... وين العقل وين الحيا وين راحِ
هذا جوابك يا حبيبي اجل وين ... لو آسفا بتعابتي والصياحِ
فقال الابن:
كل اكثر الشبان اتفحط وفرحين ... وانا الذي من بدهم بانكساحِ
стр. 1297
خلوني افرح دام عزي ويمدين ... واكشخ مع اللي يلعبون المداحي
فقال الوالد:
اشوف عقلك صاير به عناوين ... يمّا سفاه والا فماهوب صاحي
أنا فرحت وقلت اوليدي يكفين ... واتلا التلاوي صرت مالي جناحِ
فقال الابن:
عجل علي ابطلبتي لا تخلين ... ما جاك مني غير مَبْدا الصراحِ
جب لي مديل زين خله يسلين ... خلن اشوف العز هو والنجاحِ
فقالت الوالدة:
نرجي من اللي كل يوم بشان ... انه يعطفك يا جنيني على الزين
لعلي اذوق النفع مع الحنان ... واشوف برك دائم لي يبارين
فقال الابن:
قال ابشري يا والده بالتهاني ... من عقب ها الشدة ابشرك باللين
انا لك الين من جميع الأداني ... وأبي السموحه قبل يوم يوافين
ومن شعر الجديعي في التقاعد:
قالوا تقاعد قلت يالربع يا ليت ... دامي نشيط واهتني في حياتي
راح الزمان ولا بعمري تهنيت ... وانا ادير الراي ويش السواةِ
الصبر ضاق وصار مشيي تزاتيت ... يم العمل مضي عندي هياتِ
شكيت حالي لاجود الناس وابديت ... ما جاش بل خاطر من المقبلاتي
ودي يدلن كان ضعت وتعديت ... اخاف من شخص يسوي سواتي
قال انت ودك تنثبر مع هل البيت ... تقعد مع الحرمه وعند البناتِ
خلك عزيز وارفع الراس، يا شيت ... واطلب جزيل المد وافي الهباتِ
ليتي سكتّ ولا بهرجي تماديتِ ... اثر كثير الناس يبي الشماتِ
انا تعبت من العمل لين كليت ... الرجل من كثر العمل به حفاةِ
стр. 1298
بتله بهمي كل ما اصبحت وامسيت ... كني ربيط السجن خمس اسنواتِ
اقعد مع الحرمه ولاصير تزتيت ... الرزق عند الله خزانه ملاةِ
اليا طرا لي ساعة واسفهليت ... سويت فنجال على الكيف يأتي
يسوى المعاش وكل ما قلت واسميت ... منه ضمن يا القرم باقي الحياةِ
اليا حصل لي كشتة مع مناعيت ... رجالًا تجيب السالفه قبل تأتي
تنسى هموم فوق قلبك علاميت ... كبر جبال طريق متراكماتِ
على دلال يعجبنك الي جيت ... من فوق هشيم الرمث مراكياتِ
ابا اتقاعد دام عندي زعانيت ... قبل يجين الشيب والا المماتِ
ابسط لنفسك وانت من حسبة الميت ... شف المقابر عجها طايراتِ
اليا حصل لك فرصة وأرجهنيت ... تراه لي راحت فلا هيب تأتي
ولم زهابك وانتبه لاتوانيت ... تفوتك الرحله على الطايراتِ
ابرك زمانك يالسنافي إلى جيت ... وايلاك مرتاح بكل الجهاتِ
هذا زمان لي جلست وتواسيت ... يجيك بالمجلس درازن هواتي
هذي الحياة ولا تقول اطمأنيت ... خيول الزمان بسرجها والماتِ
اليا حصل لك ساعة به تهنيت ... تراها هي المكسب من الباقياتِ
هذا وصلوا عد من حج للبيت ... علي نبيٍ شافعٍ للعصاةِ
وآخر ما نختم به شعر عبد الله بن علي الجديعي عنوانها: (التوبة) قال:
يا الله يا عالم خفيات الاكوان ... يا منزل غيث المطر من سحائب
اسألك يا من كل يوم هو بشان ... يا فارج الشدات يوم المصائب
يا عالم ما بالضماير والاكوان ... يا مصرف بالكون دور الهبايب
يا محصي خلقه من الانس والجان ... يا مظهر بالغيب شيّ عجايب
يا من نصر موسى على قوم هامان ... واهلك طغاة بالبحور الرهايب
وعز جيش الصحابه بالاكوان ... وعز رايات النصر بالكتايب
стр. 1299
يا مفرج الكربات يا عالي الشان ... اغفر ذنوب فوق قلبي حطايب
انا الذي دست المعاصي وغرقان ... اغفر ذنوبي يا جزيل الوهايب
كثرة ذنوبي يا ابالافراج تبران ... عيت تفارقني وانا منك هايب
انا عصيتك يوم جهلي بالازمان ... إرحم طريح عند بابك وتايب
يا فارج الشدات يا صاحب الاحسان ... يا زايل الكربات لو هي نكايب
يا مخرج ذا النون من لج طوفان ... من بطن حوت فوقه الما ضرايب
يا منجي خليلك من لهاهيب نيران ... نار تلظى فوق ذيك اللهايب
رديت يوسف عقب غيبات واحزان ... على نبيك عقب ما صار شايب
فارق جنينه لين كفت الاعيان ... راح البصر من شد فقد الحبايب
يا رافعًا عرشك بلا عمد واركان ... يا محصيا خلق بليا كتايب
أن ترحمن يا صاحب العفو منان ... بيوم تخلَّى عنْ كل القرايب
لي جا الكفن وقربوا لي الاكفان ... وبانت دموع الباكيات الحبايب
وبانت العبرة من افلان وافلان ... زاد الغلا من بين حاضر وغايب
لي قامت الحرمه تصيّح وتنعان ... لبست ثياب حدادها للمصايب
تلقى دموعه يذرفن تقل وديان ... تكضمّ العبرات مع النحايب
جتها الحسايف يوم قامت تمنان ... تقول يا المرحوم يا أبا العجايب
ليتي طلبته يسامحن يوم الازمان ... عن زلة أو هفوة ما تناسب
إلى ادلجت ثوبي تغسله على شان ... تشم شم الرايحه كنه اطايب
من عقب موتي يوحشنه وخلقان ... دلت تصد وكن ثيابي عقارب
يوم تمت العدة وزن الازمان ... دلت تفكر وين وده تقارب
نسيت غلاي وما تمده بالايمان ... فنجال تصبه من دلال عرايب
دلت تزين للخطاطيب، يا فلان ... تبي العوض عني ولو كان شايب
كنّ بناتي يوم شالون شجعان ... على النعش من فوق حدبا صلايب
هلت مدامعهن على فوق الاوجان ... اظلم عليهن الجو من كل جانب
من اول شجعات واليوم يتمان ... بدا التلاوم بينهن والنحايب
стр. 1300
يومي رخيص عندهن قبل تدهان ... حر المنية صار صدقٍ وصايب
يوم انني فارقت كلٍّ تمنان ... كلٍّ بدا يثني الي صرت غايب
صاح الصغير وقال وراه خلان ... متى يجي حتى يجيب اللعايب
دلا يصيح: وين بابا؟ تباطان ... خلي يصيح ولجلج البيت ساكب
وانا مشيت فارقن منّ الاوطان ... مالي بها رجعه ولا لي مطالب
سلامي على الدنيا ومن لي بها أخوان ... وجميع من قلبه علي له حطايب
سلامي على عيالي والثاني لجيران ... وسلامي الثالث جميع القرايب
وسلامي الرابع على حفد واقران ... وسلامي الخامس لحاضر وغايب
وسلامي السادس على افلان وافلان ... وسلامي السابع على ام الحبايب
وسلامي الثامن على اللي تولان ... وسلامي التاسع على كل تاعب
وسلامي العاشر بناتي والاخدان ... وجميع من هلت دموعه صبايب
وتحسن عزاهم عنْ يا عالي الشان ... وتجبر مصيبتهم وكل المصايب
جاني الوداع وجان شي تغشان ... راح المزاح وشفت شي عجايب
حطون في قبري وضمن بجيلان ... وحطوا على اللبن بعد العصايب
هلوا علي الرمل لي من غطَّان ... اتلا علامتهم برزّ النصايب
يوم ارجعوا عني وانا صرت وحدان ... فكرت بالماضي ويلاها نكايب
جاني من المخلوق لا أنس ولا جان ... قالوا لي: اسمك قلت عبد متلاعب
انا الذي ضيعت وقتي وغلطان ... هالحين ما يمدين ماهي نهايب
قدامي البرزخ امور تقفان ... يوم الحساب ويوم نشر الكتايب
يوم به الوالد عن ابناه بلشان ... يوم يولي صاحب عن صحايب
احد كتابه ياضعونه بالايمان ... واحد ورا ظهره على غير طايب
يمَّا على الجنات مع باب ريان ... والا على نارٍ تلظى لهايب
* * *
يا الله بعفوك يا حبيبي تولان ... وتسامحن عن ما مضى من شوايب
انا الذي دست المعاصي وندمان ... ارجو نوالك يا كثير المواهب
